Сочила барған “Бөтә Рәсәй-2023” медиафорумында журналистар менән осрашҡан ваҡытта Башҡортостан Башлығы Радий Хәбиров элекке хәрби хеҙмәткәрҙең, граната шартлатыу менән янап, уның менән осрашыу талап иткән резонанс хәл тураһында һөйләне. “Был хәл-ваҡиғала нимәләр кисерҙегеҙ?” - тигән һорау бирҙе осрашыуҙың модераторы Рәсәй Журналистар союзы рәйесе Владимир Соловьев. -Минең өсөн иң мөһиме уның ғүмерен һаҡлау ине. Эште, башҡа нәмәне юғалтырға була, тик ғүмерҙе кире ҡайтарып булмай.Ҡыҙғанысҡа ҡаршы, был ваҡиғаларҙан һуң ул үҙенә ҡул һалған. Бындай хәл булмаһын өсөн мин барыһын да эшләнем. Шундай категория бар – “биш йөҙөнсөләр”. Ниндәйҙер сәбәптәр арҡаһында ҡайһы бер егеттәр дезертирлыҡҡа бара. Эйе, улар ҡурҡҡан, ләкин уның өсөн беҙ уларға ябырылырға тейеш түгел. Хәрби-тикшереү органдары ла уларҙы төрмәгә ултыртырға тигән маҡсат ҡуймаған. Кешеләргә уйланырға, кире барырға тип тәҡдим итәләр. Илдарҙың хәле ҡатмарлыраҡ ине, ул эстән һынғайны. Нисектер ул граната менән килеп етеп, кешеләрҙе аманатҡа алған. Ул минең менән осрашырға теләгәнен ишеткәс тә, бер секундта уйланманым, осрашып, уға ярҙам итергә кәрәклекте белә инем. Телефондан һөйләшкәндә лә уны тынысландырҙым, килгәс барыһын да хәл итербеҙ, тинем. Ул үҙен сәйер тотһа ла, килешергә маташтыҡ. Мин уға ярҙам итергә вәғәҙә бирҙем, поручительство яҙҙыҡ, әммә хәҙер үк өйөңә ҡайтаһың, тип алдашманым. Илдар миңә ышанды, гранатаһын бирҙе, беҙ һөйләштек, адвокаттар беркеттем, хәрби-тикшереү бүлегендә саҡта эргәһенә килдем. Әсәһенә һәм ҡыҙына ярҙам итергә вәғәҙә бирҙем һәм беҙ ярҙам итәбеҙ ҙә. Илдар, аҙашҡан һалдат булһа ла, минең өсөн барыбер һалдат булып ҡала, тип яуапланы һорауға Радий Хәбиров. Автор: Роман Якимчук.