Кампус нигеҙендә Инновацион фәнни-технологик үҙәк булдырыу мәсьәләһе ҡарала

Башҡортостан Хөкүмәте Премьер-министры Андрей Назаров Өфөлә донъя кимәлендәге Евразия фәнни-белем биреү үҙәгенең вуз-ара студенттар кампусын төҙөү буйынса сираттағы кәңәшмә үткәрҙе. Кампустың төп бурысы – ил иҡтисадының реаль секторына алдынғы техник ҡарарҙар йыйыу, анализлау, эшләнмәләр әҙерләү һәм ғәмәлгә индереү үҙәге булыу. Андрей Назаров Рәсәйҙең фән һәм юғары белем биреү министры урынбаҫары Айрат Ғәтиәтов менән күптән түгел эш осрашыуында вуз-ара студенттар кампусы төҙөлөшө проектын тормошҡа ашырыу барышы, шулай уҡ ил етәкселеге ҡатнашлығында объекттың беренсе сиратын асыу мәсьәләләре тикшерелеүе тураһында һөйләне. Министрҙар кабинеты етәксеһе шулай уҡ, объектив шарттарҙы һәм тәҡдим ителгән дәлилдәрҙе иҫәпкә алып, Рәсәй Фән һәм юғары белем биреү министрлығынан коллегалар менән мөһим темаларға бәйле килешеүҙәргә өлгәшелде, тип билдәләне. Бында Андрей Назаров республиканың Мәғариф һәм фән министрлығына ошоларҙы үтәү мәсьәләһен айырым контролдә тоторға һәм юл картаһы буйынса сроктарҙы боҙоуға юл ҡуймаҫҡа ҡушты. - Рәсәйҙең фән һәм юғары белем биреү министры урынбаҫары Айрат Ғәтиәтов менән эш осрашыуы аҙағында республикала Кампус нигеҙендә Инновацион ғилми-технологик үҙәк булдырыу мәсьәләһен тикшерҙек, - тип һыҙыҡ өҫтөнә алды Хөкүмәт Рәйесе. Министрҙар кабинеты етәксеһе ведомство етәкселәре, ректорҙар һәм ҡыҙыҡһынған ойошма вәкилдәре менән бергә студенттарҙың кампуста йәшәүенә бәйле мәсьәләләргә туҡталды. Артабан йөкләмәләрҙең үтәлеше тураһында Хөкүмәттең Дәүләт контроле департаменты директоры урынбаҫары Ольга Ишмөхәмәтова һөйләне. Кәңәшмәлә быйылғы йыл аҙағына тапшырыу планлаштырылған беренсе сират төҙөлөшөнә бәйле мәлдәр ентекле тикшерелде. Бинаның бөтә ҡаттарында колонналарҙы нығытыу буйынса эштәр тамамлана. Биҙәү эштәре алып барыла, кәртәләр һәм инженер селтәрҙәре монтажлана, лифт уйымдары ҡорола. Вуз-ара студенттар кампусы проектының беренсе сиратын реконструкциялау буйынса төҙөлөш эштәре һәм төҙөлөш планы-графигын тормошҡа ашырыу барышы тураһында проект офисы етәксеһенең төҙөлөш буйынса урынбаҫары, "Кампус" яуаплылығы сикләнгән йәмғиәте директоры Сыңғыҙ Хәсәнов хәбәр итте. Артабан Премьер-министр Башҡортостан Хөкүмәтенең “Өфө – 450 йыл” проект офисы департаменты директоры Олег Байдиндың IQ-парк менән кампус стилобатын берләштереү буйынса тәҡдимдәрен тыңланы. Кәңәшмәне тамамлап, Андрей Назаров кампустың икенсе сиратын төҙөүгә бәйле мәсьәләләргә лә баҫым яһаны. – Өфө фән һәм технологиялар университеты корпусына терәлеп торған элекке завод бинаһын һүтеүгә әҙерлек алып барыла. Эштәрҙе сентябрь айында тамамлау күҙаллана. Йылылыҡ, электр һәм канализация селтәрҙәренә технологик тоташтырыуҙы эшләйбеҙ. Әле объектты урам-юл һәм элемтә селтәрҙәренә тоташтырыу өсөн документтар пакеты төҙөлгән. Концессия килешеүе буйынса финанслау билдәләнгән тәртиптә башҡарыла, – тип йомғаҡ яһаны Хөкүмәт етәксеһе. Фото һәм мәғлүмәт сығанағы: pravitelstvorb.ru.