Башҡортостан Республикаһы Журналистар союзының Баймаҡ беренсел ойошмаһы, Баймаҡ районының “Һаҡмар” гәзите Икенсе Этҡол ауыл китапханаһы һәм “Ағинәйҙәр” ҡоро менән берлектә район гәзитенең элекке әүҙем хәбәрсеһе, арҙаҡлы шәхес, билдәле педагог һәм йәмәғәт эшмәкәре, яҙыусы Азамат Әғзәм улы Тажетдиновтың тыуыуына 85 йыл тулыуға арнап “Халҡына дан йырланы” исеме аҫтында ижади конкурс иғлан итә. Конкурстың маҡсаты – ошо төбәктән сыҡҡан шәхестәребеҙҙең исемен мәңгеләштереү, уларҙың тормош юлын, ижадын өйрәнеү һәм йәш быуынға еткереү, ижади таланттарҙы асыҡлау. Сара Азамат Тажетдинов иҫтәлегенә арнап мәктәп уҡыусылары, төрлө быуын вәкилдәре араһында шиғыр, хикәйә ижад итеүселәр бәйгеһе үткәреүҙе маҡсат итеп ҡуя. Мәктәп уҡыусылары конкурсҡа нәҫер һәм ҡисса ла тәҡдим итергә мөмкин. Китаптарында халҡыбыҙҙың, ауылдарыбыҙҙың тарихын, арҙаҡлы шәхестәребеҙҙең исемдәрен йәш быуынға еткереүгә күп көс һалған, әҫәрҙәрендә ил, милләт яҙмышы, тыуған ер, туған тел, йәшәү мәғәнәһе, ауыл тормошо кеүек көнүҙәк темаларҙы күтәргән ижадсы булараҡ, Азамат Тажетдинов исемендәге конкурсҡа ебәрелгән эштәр ҙә ошондай йүнәлештә булырға тейеш. Конкурста ҡатнашыусылар ике хикәйә йәки өс шиғыр тәҡдим итә ала. Бәйге мәктәп уҡыусылары һәм өлкәндәр араһында айырым үткәрелә. Шиғыр һәм хикәйә (нәҫер, ҡисса) ижад итеүселәр араһында өсәр призлы урын билдәләнә. Бынан тыш, дәртләндереү приздары ла ҡарала. Конкурс еңеүселәренә ҡиммәтле бүләктәр тапшырыла. Ижади бәйгегә шәхестең тыуған төйәгендә – Икенсе Этҡол ауылында 2023 йылдың декабрендә йомғаҡ яһала. Ошонда уҡ А.Ә. Тажетдиновтың тыуыуына 85 йыл тулыуға арналған хәтер кисәһе үткәрелә. Ижади эштәрҙе “Бәйләнештә” селтәрендәге “Сакмар-Һаҡмар гәзите/ Баймаҡ яңылыҡтары” төркөмөнә “Хәбәрҙәр” (“Сообщение”) итеп йәки ilmira1312@mail.ru электрон почтаһына ебәрергә кәрәк. Шулай уҡ Икенсе Этҡол ауылы китапханаһына ла тапшырырға мөмкин. Эштәр 20 ноябргә тиклем ҡабул ителә. Фото һәм сығанаҡ: Азамат Мөхәмәтшин.