Рәсәй Президенты Владимир Путиндың май указдарына ярашлы ҡабул ителгән “Халыҡ-ара кооперация һәм экспорт” милли проектын (национальный проект “Международная кооперация и экспорт”) тормошҡа ашырыу сиктәрендә, Төркиә вагон эшләү заводы делегацияһы компанияның генераль директоры етәкселегендәге эш сәфәре менән Белорет ҡалаһында булды. Тендер контрактын үтәү сиктәрендә Төркиә Республикаһы вәкилдәре “Урал Пружина Заводы” яуаплылығы сикләнгән йәмғиәтенең етештереү ҡеүәттәрен ҡараны һәм Башҡортостан предприятиеһы етәкселеге менән һөйләшеү үткәрҙе. Был хаҡта Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева хәбәр итте. - Төрөк уҙаҡташтары сәфәренең маҡсаты: етештереүҙе баһалау, Башҡортостан заводының компетенцияларына шәхсән инаныу, яҡтарҙың ғәмәлдәге контрактты үтәүен тикшереү, шулай уҡ артабанғы берлектәге эш пландарын билдәләү. Рәсәйҙең Төркиәләге Сауҙа вәкиллеге ҡарамағындағы Башҡортостан Вәкиллеге эше һөҙөмтәһендә беҙ быйыл тәүге алты айҙа Төркиә Республикаһы менән тауар әйләнешенең 2022 йылдың ошо уҡ осоро менән сағыштырғанда 87,8 процентҡа артыуын билдәләйбеҙ. Шул уҡ ваҡытта экспорт уҙған йыл күрһәткестәре менән сағыштырғанда 81,8 процентҡа артҡан, – тине ул. Хәтерегеҙгә төшөрәбеҙ, уҙған йылдың октябрендә Башҡортостан Республикаһы Төркиәләге вәкиллеге ярҙамында Башҡортостан заводы Төркиә заводы ихтыяждары өсөн вагон пружиналарын һатыу буйынса тендерҙа еңеү яуланы. Төркиә делегацияһы башлығы “Урал Пружина Заводы” яуаплылығы сикләнгән йәмғиәтенең етештереү кимәленең юғары булыуын, контракт шарттарын үтәүгә яуаплы ҡарашты билдәләне һәм үҙ-ара файҙалы хеҙмәттәшлекте дауам итеүгә өмөт белдерҙе. Белешмә: 2023 йылдың ғинуар-мартында Төркиә Республикаһына экспорт нигеҙен химия сәнәғәте продукцияһы, ағас һәм целлюлоза-ҡағыҙ әйберҙәре, аҙыҡ-түлек тауарҙары һәм сеймал, башҡа тауарҙар тәшкил итә. Фото һәм мәғлүмәт сығанағы: foreign.bashkortostan.ru