Полиция хеҙмәткәрҙәре Белорет районында һәләк булған кешегә бәйле юл фажиғәһенең сәбәптәрен асыҡлай. Республиканың ЮХХДИ идаралығының матбуғат хеҙмәтенән хәбәр итеүҙәренсә, 8 сентябрҙә Өфө – Инйәр – Белорет автомобиль юлының 112-се километрында “Лада Гранта” менән “Рено Меган” автомобилдәре бәрелешкән. Юл-транспорт ваҡиғаһы һөҙөмтәһендә "Лада Гранта"ның 64 йәшлек водителе алған йәрәхәттәренән ашығыс медицина ярҙамы килгәнгә тиклем үк вафат булған. Ваҡиға урынында ЮХХДИ хеҙмәткәрҙәре һәм башҡа хеҙмәттәр эшләй. Ваҡиғаның сәбәптәре асыҡлана. Хөрмәтле водителдәр, алдағы көндәрҙә көслө ямғырҙар көтөлә, шуға ла юлға сығыуҙан тыйылыу хәйерлерәк. Онотмағыҙ: ямғырлы көндәрҙә юлда йөрөү икеләтә хәүефле. Фото: @bash_gibdd