Тарихи шәхестәр тураһында документаль фильмдарҙың исем туйы булды

“Родина” кинотеатрында башҡорт ерендә тыуған тарихи шәхестәр тураһында “Атайсал. Беҙҙекеләр! Знай наших!” балалар өсөн документаль фильмдың исем туйы булды. Был проект Башҡортостан Башлығы гранттары фонды ярҙамында тормошҡа ашырылған. Ул “Тамыр” балалар-үҫмерҙәр телеканалы ҡатнашлығы менән “Бишек” коммерцияға ҡарамаған ойошма булышлығында төшөрөлгән. Прект авторҙары тарихи шәхестәр портреттары менән Геройҙар аллеяһы булдырған – фильм улар тураһында. Аллеяны асыу һәм йәшел таҫманы киҫеү бәхете тарихи шәхестәрҙең бала сағын уйнаған йәш актерҙарға – Заһир Әминевкә, Наҙгөл Зәйнетдинова һәм Морат Ярышевҡа эләкте. Был көндө кинотеатр фойеһы йырҙарҙан, төрлө уйында ҡатнашҡан балаларҙың шат тауышынан гөрләп торҙо. Ҡыҙыл залда балаларҙы тантаналы шарттарҙа Бөтә донъя башҡорттары ҡоролтайы Президиумы рәйесе, РФ Дәүләт Думаһы депутаты Эльвира Айытҡолова һәм Башҡортостандың “Ирҙәр ҡоро” йәмәғәт ойошмаһы рәйесе, РФ Дәүләт Думаһы депутаты Зариф Байғусҡаров сәләмләне. Улар пректтың ижади командаһына Рәхмәт хаттары тапшырҙы. Балалар өсөн документаль фильм феноменаль руда сәнәғәтсеһе, Санкт-Петербургта тау училищеһы асҡан меценат Исмәғил Тасимов, арҙаҡлы хәрби начальник, башҡорт старшинаһы Кинйә Арыҫланов, совет дипломанты, Совет Рәсәйенең ғәрәп илдәрендәге беренсе вәкәләтле вәкиле Кәрим Хәкимов, тәүге профессиональ рәссам, педагог Ҡасим Дәүләткилдеев, БАССР-ҙың киң билдәле мәғариф министры Фатима Мостафина, тәүге башҡорт летчигы, Өфө аэроклубын төҙөүсе, “Башосоавиахим” начальнигы Ғәлимйән Ишмурзин, күренекле яҙыусы, төрки илдәрендә ҡатын-ҡыҙҙарҙан тәүге булып роман-трилогия ижад иткән Зәйнәб Биишевалар тураһында төшөрөлгән. -Бөгөн һөҙөмтә көткәндән юғарыраҡ булды. Былтыр “Атайсал! Беҙҙекеләр! Знай наших!” проектында ҡатнашырға хәл иткәс, бәләкәй ватан ҡиммәттәре идеяһын заман балаларына аңлатып еткерә алырбыҙмы тигән икеләнеү булғайны. Килеп сыҡты был эш. Бөгөн проект командаһының рух байрамы. Башҡорт ерендә тыуған күренекле шәхестәр тураһында йөкмәткеле, заманса фильмдар төшөрә алғаныбыҙ өсөн шатланам, - тине проект концепцияһы авторы, “Тамыр” балалар-үҫмерҙәр телеканалы директоры Гөлназ Ҡолһарина. “Атайсал! Беҙҙекеләр! Знай наших!” медиа-проекты - башҡорт телен үҫтереүҙә һәм үҫеп килеүсе быуында илһөйәрлек тойғоһо тәрбиәләүҙә тәьҫирле инструмент. Туған тел - Атайсал теле. Ул әлеге проект ярҙамында тағы ла сағыуыраҡ, замансараҡ, яңғырауығыраҡ булып китте. https://www.bashinform.ru/news/culture/2023-09-04/v-ufe-detyam-pokazali-tsikl-istoricheskih-filmov-o-zemlyakah-ataysal-be-ekel-r-znay-nashih-3418797