Тире һаулығы һәр саҡ мөһим

4-10 сентябрҙә Рәсәй Һаулыҡ һаҡлау министрлығы тире ауырыуҙарын иҫкәртеү аҙналығын үткәрә. Республика тире-венерология диспансерының 6-сы дерматология бүлеге мөдире Надежда Надырченко төбәктә киң таралған тире ауырыуҙары, уларҙың билдәләре һәм иҫкәртеү саралары хаҡында бәйән итте. Мәғлүм булыуынса, бөгөн иң йыш осраған тире ауырыуы - псориаз. Таралыу буйынса икенсе урында - экзема, атопик дерматит, ҡыҙыл яҫы лишай. Артабан контакты-аллергик дерматит, токсикодермия, тиреләге бәшмәк ауырыуҙары килә. - Бәшмәк ауырыуҙары йышыраҡ ҡыш көнө, йылы аяҡ кейеме кейгәндә осрай – ти белгес. Л – Экзема менән псориаз да йышыраҡ көн һалҡын ваҡытында барлыҡҡа килә. Токсикодермия иһә ҡулланған аҙыҡ-түлеккә йәки дарыуға реакция булараҡ барлыҡҡа килә һәм йышыраҡ йәй көнө сыға, бигерәк тә беҙҙең рационда йәшелсә һәм емеш-еләк әүҙем ҡуланылғанда киң тарала. Контактлы аллергия дерматиттары ла кешеләрҙе йылдың йылы миҙгелендә йышыраҡ зарарлай, бигерәк тә баҡса-ҡала эштәре ваҡытында: уға ер, төрлө үҫемлектәр, ашламалар менән бәйләнешкә инеү булышлыҡ итә. Шул уҡ ваҡытта псориаз һәм экзема, башлыса, өлкәндәрҙә осрай, ә башҡа тире ауырыуҙары балаларҙа күберәк, сөнки тиреләре нескәрәк һәм тиҙ реакция биреүсән. - Тире ауырыуҙары булмаһын өсөн төп иҫкәртеү сараһы - тирене даими тәрбиәләү зарур. Ҡулдарҙы нейтраль саралар менән йыуыу – иң яҡшыһы, бигерәк тә гель формаһынағы һәм яңы тыуған балалр өсөн тәғәйенләнгән саралар отошло. Улар балаларға ла, өлкәндәргә лә ярай. Ҡулдарҙы махсус косметик саралар менән йомшартырға кәрәк, хәҙер уларҙың төрҙәре бик күп. Шулай уҡ артыҡ йылыныуҙан һәм һыуыҡ тейҙереүҙән һаҡланырға, миҙгел буйынса кейенергә кәрәк. Аяҡтар тирләргә йәки өшөргә тейеш түгел, ҡулдарҙы һалҡындан бирсәткә йәки бейәләй менән һаҡларға кәрәк, – ти дерматовенеролог. Ә псориазды иҫкәртеүгә, һанап үтелгән сараларҙан тыш, стрестарҙан һаҡланыу ҙа инә. Был сиргә бирешеүсән кешеләргә яҡшы ял һәм йоҡо файҙалы. Надежда Надырченко тире ауырыуҙарының тәүге билдәләре хаҡында ла һөйләне. Әгәр һеҙ тәнегеҙҙә тынғыһыҙлаған һәм ике-өс көн дауамында үтмәгән, сабыртып торған үҙгәрештәрҙе күрһәгеҙ, дерматологҡа мөрәжәғәт итергә кәрәк. Шуныһы мөһим: табипҡа мөрәжәғәт итер алдынан клиник картинаны боҙмаҫ өсөн косметик сарала ҡулланмау мөһим. Фото: Надежда Надырченконың шәхси архивынан.