Башҡортостан Республикаһы Хөкүмәте Премьер-министры Андрей Назаров рәйеслегендә үткән ултырышта «Һаулыҡ һаҡлау» милли проектын тормошҡа ашырыу мәсьәләләре ҡаралды. - Былтыр был маҡсатҡа һигеҙ миллиард һумға яҡын аҡса йүнәлтелде. Был ваҡыт эсендә республика 50-нән ашыу яңы модулле фельдшер-акушерлыҡ пункты алды. Өс меңдән ашыу берәмек медицина ҡорамалы һатып алынған һәм ҡуйылған. Бөрөлә һәм Саҡмағош ауылында ике поликлиника, шулай уҡ ике капиталь табип амбулаторияһы һәм һигеҙ фельдшер-акушерлыҡ пункты асылған. 2023 йылда «Һаулыҡ һаҡлау» милли проектының һигеҙ төбәк проекты буйынса саралар тормошҡа ашырыла. Финанслауҙың дөйөм күләме - 7 миллиард 361 миллион һум, шуның 4 миллиард 102 миллион һумы - федераль бюджет аҡсаһы, - тип билдәләне Министрҙар кабинеты башлығы. Быйыл өс поликлиниканы, үҙәк район дауаханаһын, Балалар онкологияһы һәм гематологияһы үҙәген төҙөп бөтөү, 90 модуль конструкцияһын ҡуйыу, медицина ойошмаһын ремонтлау, 4308 берәмек медицина ҡорамалы һәм 168 автомобиль һатып алыу күҙаллана. Башҡортостандың һаулыҡ һаҡлау министры Айрат Рәхмәтуллин хәбәр итеүенсә, «Йөрәк-ҡан тамырҙары ауырыуҙарына ҡаршы көрәш» программаһы сиктәрендә 53 миллион һумдан ашыу суммаға 42 берәмек медицина ҡорамалы урынлаштырылған. Биш медицина ойошмаһы - республиканың беренсел ҡан тамырҙары бүлексәләре һәм төбәк ҡан тамырҙары үҙәктәре йыһазландырылған. «Онкология сирҙәренә ҡаршы көрәш» программаһы буйынса ете медицина ойошмаһы йыһазландырылған, 126 миллион һумдан ашыуға 31 берәмек медицина ҡорамалы һатып алынған. Һаулыҡ һаҡлауҙың беренсел звеноһын яңыртыу сиктәрендә 65 тиҙ төҙөлә торған фельдшер-акушерлыҡ пункттары модулле конструкцияһы ҡуйылған. Уларҙың өсәүһе медицина эшмәкәрлеген тормошҡа ашырыуға лицензия алған. Ҡалғандары биналарҙың һәм бүлмәләрҙең санитар талаптарға тап килеүе тураһында санитар-эпидемиологик һығымталар алыу стадияһында. Андрей Назаров Һаулыҡ һаҡлау министрлығына үҙ йүнәлеше буйынса эште дауам итергә һәм ай һайын милли проектты тормошҡа ашырыу барышы тураһында мәғлүмәт биреү бурысын йөкмәтте. Айрат Нурмөхәмәтов фотоһы. Сығанаҡ: https://pravitelstvorb.ru/news/21719/