"Бөгөн Баймаҡ районының Сыңғыҙ ауылына район ағинәйҙәре йыйылды. Тәүҙә улар ауыл китапханаһында түңәрәк өҫтәл артында бөгөнгө эшмәкәрлектәре, пландары, проблемалары хаҡында һөйләште. Унан ауылдың күркәм тауы Алсынбай итәгенә йыйылды. Бында Сыңғыҙҙың "Йәнтөйәк" ансамбле инәйҙәре кейеҙ баҫыу буйынса оҫталыҡ дәресе күрһәтте. Әйткәндәй, инәйҙәр был сараға алдан әҙерлек эше башлағайны. Бер көнө күмәкләп һарыҡ йөнө ҡырҡтылар, йөндө баҫыуға әҙерләнеләр", - тип хәбәр итә Сибай ҡалаһындағы "Атайсал" гәзите журналисы Резеда Вәлиева. Был сараға ағинәйҙәр менән бергә ҡул эшенә оҫталар, был шөғөл менән ҡыҙыҡһыныусылар ҙа килгән. Мәҫәлән, Баймаҡ ҡалаһының Халыҡ ижады үҙәгендәге "Хазина" оҫта ҡулдар түңәрәгенән Рәзинә Салауат ҡыҙы Ҡотлоғужина сергытыш эшләү буйынса оҫталыҡ дәресе үткәргән. Халҡыбыҙҙың йолаларын һаҡлаған, уларҙы тергеҙеү, йәштәргә еткереү йәһәтенән ҙур эш башҡарған ағинәйҙәргә "Афарин!" тибеҙ. Киләсәктә лә шулай берҙәм булып, милли асыбыҙға тоғролоҡ һаҡлап йәшәргә яҙһын! Сығанаҡ һәм фото: vk.com/ataysalgazeta ("Атайсал" гәзите төркөмө).