“Ул балаһы тыуғанын ныҡ көтә ине”

Яҡташыбыҙ менән булған был хәл тураһында яҙғайныҡ инде. Аргентинала бер нисә айлыҡ ҡына сабыйын ҡулына тотоп 29 йәшлек Өфө ҡатыны Елена (исеме үҙгәртелде) тәҙрәнән ҡолап һәләк булды. Әлеге ваҡытта был фажиғәнең сәбәптәре билдәле түгел, Аргентина полицияһы иренең ғәйебен тикшерә. Ә “КП-Өфө” баҫмаһы ҡатындың әхирәттәре менән аралашҡан. Елена сағыу һәм һылыу ҡатын булған. Өфөлә мода тармағында арт-директор булып эшләгән, ижади мөхиттә йыш булған. Һылыу ҡатынға ир-егеттәр яғынан да иғтибар күп булған, йыш ҡына социаль селтәрендә ҙур сәскә гөлләмәләре ҡуйған. Тик бер йыл элек барыһы ла ҡапыл үҙгәрә. Ул Мәскәүгә күсә, унда кейәүгә сыға. Шул саҡта социаль селтәрҙән дә юғала, яңы фотолар һәм яҙмалар ҡуймай башлай. Элекке таныштары менән аралашыуын да туҡтата. – Ирен йүнләп белмәйбеҙ. Ул да ижади мөхиттә йөрөй торғайны, улар шунда танышҡан. Шуныһы аптырата, ул социаль селтәрендә ире менән бер генә фото ла ҡуйманы, – тигән Таисия исемле әхирәте. Былтыр көҙ уларҙың туйы була һәм күп тә тормай улар илдән сығып китә. Тәүҙә Грузияла йәшәйҙәр, аҙаҡ Төркиәгә күсәләр. Ә ауырға ҡалғас, улар Аргентинаға барырға була, сөнки был илдә бала тыуһа, гражданлыҡты балаға ла, ата-әсәһенә лә бирәләр. Әхирәттәре әйтеүенсә, Еленаға яңы тормошо бик оҡшай, ул түҙемһеҙләнеп балаһы тыуғанын көтә башлай. Киләсәккә ҙур пландар ҡороп йәшәйҙәр. Ҡайһы берҙә Өфөнө һағынһа ла, сит илдә йәшәргә ярата. Сабый майҙа тыуа. Ҡатын бөтөнләй социаль селтәрҙән юғала. Әхирәттәре әйтеүенсә, Елена кешеләр менән бик яҡын дуҫлашып бармаһа ла, изге күңелле, шаян, тормошто яратҡан кеше була. Шуға күрә уның үҙенә ҡул һалыуына ышана алмайҙар. Аргентина полицияһы фекере буйынса, үлер алдынан ҡатын ире менән талашҡан. Ғөмүмән, таныштары уларҙы һуңғы ваҡыт йыш әрләшкән тип һөйләй. Сөнки Елена Өфөгә ҡайтырға теләгән, ә ире ебәрмәгән тиҙәр. Шуныһы, үлер алдынан ҡатын үҙенең иң яҡын әхирәтенә шылтыратҡан, тик ул телефонды алмаған. Шуға күрә уның нимә әйтергә теләгәнен бер кем белмәй. Яҡын арала был эштә асыҡлыҡ булыр тип көтәбеҙ. Ә Еленаның туғандары уның кәүҙәһен алып ҡайтыу мәшәҡәте менән була. Фото: "База" телеграм-каналы.