Шиғыр яҙған ҡатын-ҡыҙ Шиғыр яҙған ҡатын-ҡыҙға Минең күңел һөйөнә. Сәскә бүләк иткем килә Алып сығып өйөнән. Шиғыр тыуҙырған ҡатын-ҡыҙ – Торғаны бер фәрештә. Булмышҡайы – оло һабаҡ Тормош тигән дәрестә. Шиғыр яҙған ҡатын-ҡыҙға Бар йөрәктән һоҡланам. Уға арнап ҡәләм алһам, Уй-хистәрем һутлана. Ғилми йәнле шағирә һин, Шиғри йәнле ғалимә. Һинең кеүек илһамиә - Нағыш тыуған илемә. Илдең рухи хазинаһы Биҙәп тора үҙеңде. Ҡыйыу әйтер кимәлдәһең Халҡыңа йор һүҙеңде. Рухи вәкилдәре менән Шөһрәт тота Дәүләкән. Һиндәй рухиәләр барҙа Сәскә ата дәүләтем. Шиғриәт тә, ғилмиәт тә Булһын талмаҫ ҡанатың. Шиғри майҙан тотҡаныңда Һайрар ҡоштар ҡала тын. Шиғри илһамлы ҡатын-ҡыҙ, Һынауҙарың, һай, оло. Шиғыр яҙған ҡатын-ҡыҙ ул – Ил күңеленең ҡылы. Дәүләкән районының Мәкәш ауылында тыуып үҫеп, әлеге көндә Өфө фән һәм технологиялар университетында уңышлы эшләп йөрөгән ғалимә, шағирә, Рәсәйҙең һәм Башҡортостандың Яҙыусылар союзы ағзаһы, йәш фольклорсы, халыҡ ынйыһы хазиналарын йыйыусы, һаҡлаусы һәм өйрәнеүсе төрлө яҡлы талант эйәһе Олеся Вәкил ҡыҙы Әхмәтрәхимова республикабыҙҙың иң төп ижади ойошмаһы тарафынан һуңғы ике йылдағы әҙәбиәт өлкәһендәге хеҙмәттәре өсөн, атап әйткәндә, “Башредактор” онлайн-нәшриәтендә донъя күргән “Тынғыһыҙ ел” шиғыр китабы, Мәскәү ҡалаһының “Просвещение-Союз” һәм “Балалар һәм үҫмерҙәр китабы” нәшриәттәрендә ташҡа баҫылған “Хәҙисә өләсәй әкиәттәре” комплекслы-күргәҙмә материалдары (төҙөүселәре – Г.Р. Абдуллина, О.В. Әхмәтрәхимова) менән “Тылсымлы өйрәк” әкиәттәр йыйынтығы (төҙөүселәре – Р. Әхмәтрәхимова, О. Әхмәтрәхимова) Шәйехзада Бабич исемендәге дәүләт йәштәр премияһына тәҡдим ителеүе мәғлүм булғас, ҡыуанысым эсемә һыйманы. Себеште көҙ һанайҙар тигәндәй, ҡәләмиәнең зирәк, көс-дәрте ташып ижад иткән осорона һөҙөмтә яһар миҙгел етте. “Миҙгел” тип әйтеүем дә тиккә түгел, сөнки был тормоштағы һәр осоробоҙ донъяуи үлсәм өсөн бары тик бер миҙгел генә. Тыуған мәктәбендә алған һабаҡтар, Башҡорт дәүләт университетында уҡыу, башҡорт әҙәбиәте һәм фольклоры кафедраһы ҡарамағындағы “Шоңҡар” әҙәби-ижад берекмәһенең эшендә әүҙем ҡатнашыу, бер үк ваҡытта атайсалы менән дә ижади бәйләнеште өҙмәй, Ә. Хәкимов исемендәге “Дим” әҙәби түңәрәгенең ағзаһы булараҡ, “Дим тулҡындары”, “Йөрәк аһәңе”, “Йәйғор”, “Дәүләкән ынйылары” йыйынтыҡтарында, юғары уҡыу йортондағы “Шоңҡар тауышы” серияһында шиғырҙарын баҫтырыу, Бәләбәйҙә уҙған “Илһам шишмәләре” шиғриәт фестиваленең лауреаты дипломына лайыҡ булыу, Тарих, тел һәм әҙәбиәт институты аспирантураһын тамамлау, үҙ төбәгендә яралған “Заятүләк менән Һыуһылыу” эпосы буйынса кандидатлыҡ диссертацияһы яҡлау, мәҙәниәт усаҡтарында ең һыҙғанып эшләп тә өлгөрөү, З. Биишева исемендәге Башҡортостан “Китап” нәшриәтендә “Тау шишмәһе” тигән шиғырҙар йыйынтығын сығарыу, фольклористика һәм әҙәбиәт ғилеме буйынса фәнни мәҡәләләр яҙыу, эш һәм донъя мәшәҡәттәренә бирешмәй ҡыҙы Зөлхизәгә әсәй булыу бәхетенә ирешеү... Бына ҡыҫҡаса нимәләрҙе үҙ эсенә ала был миҙгел. Ниндәй тос йөкмәткеле миҙгел. Ниндәй ҙур багаж менән килеп баҫҡан Олеся Вәкил ҡыҙы был осор түбәһенә. Алда яңы үрҙәр, башҡа һынауҙар. Күптән инде сынығыу үтеп өлгөргән йәш ижадсыға саф, таҙа, ашығыс йылғанан киң һәм серле диңгеҙгә ҡушылып, елкән киреүе, ғәйрәтле тулҡындарға ҡаршы барыуы артыҡ ауыр булмаҫ тип ышанам. 2019 йылда шәхсән үҙем Шәйехзада Бабич исемендәге дәүләт йәштәр премияһына тәҡдим ителдем. Был ваҡиға ижад кешеһе өсөн ни тиклем тулҡынландырғыс, мөһим, яуаплы икәнен яҡшы аңлайым. Шуға ла күңел йылым менән уртаҡлашырға, йөрәк телемемде бүлеп бирергә әҙермен ҡәләмдәшемә. Үҙем шиғриәт менән мауығыусы булараҡ, башҡа ҡәләмгирҙәрҙе кисерә беләм. Ниндәй генә эшкә тотонһаң да, шиғри фекер, фәлсәфә, хистәр бураны эргәлә генә йөрөй. Шуның арҡаһында башҡа жанрҙарҙа эшләүе ауыр шағирға. Ә бына Олеся кеүек ғилем менән шөғөлләнгән шағир – ваҡытлыса үҙ-үҙен еңә алған иң батыр илһам эйәһелер. Олесяның әсәлек наҙын, ҡатын-ҡыҙ бурысын һәм яуаплылығын, нескә заттарҙың эске донъяһын баҫалҡы ғына итеп асып биргән шиғырҙары йөрәгемә май булып яғылһа ла, рухташымдың күптән танылыу алған, уны шағир итеп танытҡан төп әҫәре бар. Шиғриәт һөйөүселәр һиҙемләгәндер, ул шиғыр "Үлемһеҙ полк" тип атала. 21-се быуат башы башҡорт әҙәбиәтендә Бөйөк Еңеүгә арналған иң төп шиғыр тип ҡабул итәм мин был илһам емешен. Халыҡ та уны Бөйөк Еңеү лозунгыһы итеп ҡабул ҡылырға өлгөрҙө, сөнки ул матбуғат биттәрендә бер тапҡыр ғына баҫылманы, йәмғиәттә киң танылыу алды. Йәғни үлемһеҙ шиғырҙар янына тағы бер ижад өлгөһө өҫтәлде. Эйе, Бөйөк Еңеүҙе билдәләү яңы йүнәлеш алғанда әҙәбиәттә лә яңы һүҙ кәрәк ине. Дәүләкән һылыуҡайының фекерләү ҡеүәһе Асылыкүлдәй тәрән һәм киң. Шул осорҙа ул тиҫтер ҡәләмдәштәре тураһында ҡыйыу һүҙен әйтергә лә өлгөрҙө. Әйткәндәре “Хәҙерге башҡорт тел ғилеменең көнүҙәк проблемалары” тигән дөйөм йыйынтыҡҡа ингән “Йәштәр шиғриәтендә туған телде һаҡлау, илһөйәрлек темаларының сағылышы” мәҡәләһендә асыҡтан-асыҡ сағыла. Ғалимә булараҡ, ул эҙләнеүҙәр өҫтөндә ҡайнаһа, шиғриәттә лә үҙ асылына, тормош һорауҙарына яуаптар эҙләй. Бәләкәйҙән халык ижады ынйыларының тәмен тойоп үҫкән, аҙаҡ төрлө ҡәрҙәш илдәрҙә фольклорсылар конгрестарында ҡатнашҡан рухиәнең әкиәт йыйынтыҡтарын сығарыуға тос өлөш индереүе осраҡлы күренеш түгел. Уларҙы бер ни тиклем “ғаилә энциклопедияһы” тип атарға ла мөмкин. “Хәҙисә өләсәй әкиәттәре” комплекслы-күргәҙмә материалдарҙы алһаҡ, йәш ғалимәнең рухи яҡтан үҫеүендә баһалап бөткөһөҙ мөһим роль уйнаған Хәҙисә өләсәһе күҙ алдына баҫа. Ә бына “Тылсымлы өйрәк” әкиәттәр йыйынтығын ул әсәһе, тыуған яҡты өйрәнеүсе Рәйзә Зәйҙулла ҡыҙы менән берлектә әҙерләгән. Был ижади гөлләмәләр балалар өсөн авторҙың шиғырындағы кеүек "ҡуян күстәнәсе" булыр тигән ышаныстамын. Болоҡһоуланып киткән сағында яҙған “Ҡаурый ҡәләм” тигән шиғырын Олеся Әхмәтрәхимова: ...Бөгөнгө ғәмһеҙ замандың Шағиры булғым килмәй, – тип тамамлай. Әммә унан һуң күпме шиғырҙар яҙҙың һин. Тыуасаҡ шиғырҙарың алда әле, сөнки: Йөрәгеңдә Бабич рухы, Бабич ялҡыны. Сағыу милли ынйыһы һин Башҡорт халҡының!!! Бындай ялҡынлы юлдар, Олеся Әхмәтрәхимова һымаҡтар тураһында һүҙ тотҡанда, йөрәктән урғылып сыға. “Заятүләк менән Һыуһылыу” эпосы тыуған төбәктең данлыҡлы яҙыусыһы Әхиәр Хәкимов әҫәрҙәре йоғонтһонда ҡәләмен сарлаусы, милли хазиналарҙы йәнеләй күреп, түкмәй-сәсмәй халҡына еткереүсе Рәсимә Ураҡсина ижадын маяҡ итеп алыусы, шағирә Лариса Абдуллина өлгөһөнә эйәреүсе башҡорт әҙәбиәтенең йәш һәм һәләтле вәкиле Олеся Әхмәтрәхимова һис шикһеҙ Шәйехзада Бабич исемендәге дәүләт йәштәр премияһына лайыҡ. Ринат СӨЛӘЙМӘНОВ, Башҡортостан Яҙыусылар союзы ағзаһы.