Ғафури районында Рәсәй Президенты Владимир Путиндың май указы менән раҫланған “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проекты буйынса (национальный проект “Малое и среднее предпринимательство и поддержка индивидуальной предпринимательской инициативы”) маҡсатлы эш алып барыла. Райондың бизнес-шәрифе Артур Ғафаров белдереүенсә, 2014 йылда Әлфиә Смирнованың ғаиләһе дөйәғош үрсетә башлаған. һуңынан эшҡыуарҙар «Иҫ киткес дөйәғош» фермаһын асҡан. Был ваҡытта улар дәүләт ярҙамы һорап мөрәжәғәт итеп Башҡортостан Ауыл хужалығы министрлығының яңы эш башлаған фермерҙарға ярҙам итеү буйынса программаһы сиктәрендә ауыл хужалығы техникаһы һатып алыуға 1,3 миллион һум күләмендә грант ала. Ошо йылдар эсендә татыу ғаиләнең яратҡан шөғөлө ҙур бизнесҡа әүерелде. Хәҙер «Иҫ киткес дөйәғош» Ғафури районында йәшәүселәрҙең генә түгел, ҙур биләмәлә иркен йөрөгән йәнлектәрҙе һәм ҡоштарҙы ҡарарға килгән туристарҙың да ял итеү урынына әйләнде, - ти райондың бизнес-шәрифе. Ҡунаҡтарға уңайлы булһын өсөн кафе эшләй. Быйыл фермала яңы административ корпус асылған, артабан эшҡыуарҙар планында - йыл аҙағынаса һуйыу цехы һәм ит ярымфабрикаттарын эшкәртеү цехы төҙөү һәм сафҡа индереү. Эшҡыуарҙар “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү" милли проекты сиктәрендә ярҙам институттарына мөрәжәғәт итергә ниәтләй. Бизнес-проектты бойомға ашырыу өсөн Әлфиә Смирноваға муниципаль программала ҡатнашырға тәҡдим ителгән. - Смирновтар ғаиләһенә яратҡан эшен артабан да үҫтереүҙе һәм бөтә билдәләнгән пландарҙы тормошҡа ашырыуҙы теләйбеҙ. Ә үҙ эшен асырға теләүселәрҙең йәки үҙ бизнесы булғандарҙың һәммәһе лә артабан үҫешергә теләһә, Ғафури районы хакимиәтендә «Эшҡыуарлыҡ сәғәте»ндә көтәбеҙ, - ти Артур Ғафаров. Был сараларҙың барыһы ла Рәсәй Президенты Владимир Путиндың май указына ярашлы булдырылған “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү" (национальный проект "Малое и среднее предпринимательство и поддержка индивидуальной предпринимательской инициативы") милли проектына ярашлы атҡарыла. Фото: Радий Хәбировтың бизнес менән аралашыу төркөмө.