Юлдыбайҙар кейеҙ баҫты

Һуңғы ваҡытта ағинәйҙәр тарафынан онотола барған кәсептәр тергеҙелә. Шундайҙарҙың береһе - кейеҙ баҫыу буйынса райондрҙа ағинәйҙәрҙең оҫталыҡ дәрестәре үтә. Ошо көндәрҙә Йылайыр районының Юлдыбай ауылында ла сара уҙҙы. Юлдыбай ауылы ағинәйе Флүрә Шәрәфетдинова хәбәр итеүенсә, Юлдыбай ауылында үткән "Аҡ кейеҙем аҡ бәхеттәр юрай" тип аталған оҫталыҡ дәресенә Яманһаҙ, Сиҙер, Байғужа, Ҡыпсаҡ, Йылайыр ауылынан да ағинәйҙәр килгән. "Яҡын-тирә ауыл ағинәйҙәрен туплап, ойоштороп, милли ҡомартҡыларҙы тергеҙеүҙә ҙур эш башҡарған район һәм Юлдыбай ауылы ағинәйҙәре ҡорҙарының әүҙем етәксеһе, ошо район кимәлендә үткән оҫталыҡ дәресен алып барыусы Миләүшә Шаһыбал ҡыҙы Моратова сараның маҡсаты менән таныштырҙы. Кейеҙ баҫырға өйрәнергә теләүселәр менән таныштырып, уларға рәхмәт белдерҙе. Тағы шуны билдәләп үтергә кәрәктер: Миләүшә Шаһыбал ҡыҙы кейеҙ баҫыу оҫталыҡ дәресен ике йыл дауамында үткәреп килә. Былтыр йәй йәмле Һаҡмар йылғаһы буйында кейеҙ баҫылһа, ҡыш көндәре йөндән быйма башы, түбәтәй, тәпешкә эшләү буйынса дәрестәр үткәрҙе. Артабан инеш һүҙ менән Шәүрә Миңлеғәли ҡыҙы Ҡорбанғәлиева сығыш яһап, кейеҙҙең файҙаһы тураһында мәғлүмәт бирҙе. Ауылыбыҙҙың абруйлы ағинәйҙәренең береһе булған Әнисә Ишбулды ҡыҙы Алсынова кейеҙҙең килеп сығыуы тураһында риүәйәт, кейеҙгә бәйле булған йолалар тураһында һөйләне. Махсус хәрби операция биләмәһендә йөрөгән егеттәребеҙгә Әнисә Ишбулды ҡыҙы, Рәшиҙә Вәлиева, Тәнзилә Абдуллина, Вазифа Шәрипова һәм улы хәрби операцияла булған Рәйлә Ҡотошова кейеҙ баҫып, билгә бәйләп йөрөү өсөн, ултырған-ятҡанда түшәк итеп тә ҡулланыуға уңайлы билбау эшләп, гуманитар ярҙам менән ебәрҙеләр. Тәнзилә Абдуллина оҫталыҡ дәресенә йыйылған, кейеҙ баҫыу серҙәренә төшөнөргә, өйрәнергә теләк белдереп килеүселәргә рәхмәт белдерҙе, уңыштар теләп "Фатиха" сүрәһен уҡыны. Һарыҡ йөндәре тетелеп, кейеҙ баҫыу өсөн 10 урында уңайлап, шартына килтереп, сәхнә иҙәненә әҙерләп һалынған. 4-5 ҡаҙанда һыу ҡайнай. Ҡыҙыу эш башланып китте. Берәүҙәр эҫе һыу ташый, икенселәре йөнгә һыу һибә, өсөнсөләре һабынлай. Кемдәрҙер тәүге тапҡыр кейеҙ баҫып ҡараны, оҫталар оҫталығын күрһәтте, кәңәш бирҙе, тәжрибә уртаҡлашты. Юлдыбай мәктәбенең тәрбиә эше буйынса директор урынбаҫары Зилә Рәфҡәт ҡыҙы Абдуллина 5-се класс уҡыусыларын оҫталыҡ дәресенә алып килде. Милли кейемдәрҙә килгән уҡыусылар фәһемле мәғлүмәт алды. Кейеҙҙе тирмәгә ябыу, эйәр, ҡамыт, серге яһау, сарыҡ, түшәк итеп тә ҡулланылыуын, ҡыҙҙарға бирнә итеп тә бирелеүе, киленде аҡ кейеҙгә баҫтырыу йолалары тураһында Әнисә Ишбулды ҡыҙының һөйләгәнен ихлас тыңланылар. Кейеҙ баҫыу процесын иғтибар һәм ҙур ҡыҙыҡһыныу менән күҙәттеләр. Үҙҙәре менән йырлы күстәнәс тә алып килгәндәр. Ҡаҙандарҙа һыу эҫей, самауырҙар күңелле йырлай, тағы ике ҡаҙанда бутҡа бешә. Миләүшә Шаһыбал ҡыҙы һәр бер кейеҙ баҫыусы янына барып кәңәштәр бирә, кейеҙҙең нығыраҡ бешеләнеүен, мөйөштәре тигеҙләнһен өсөн, ҡаҡ таҡтаға шапылдатып ташлап та күрһәтә. Оҫталыҡ дәресенең һөҙөмтәһе булып, уңғандарҙың ҡулдарынан матур, тигеҙ, тығыҙ итеп баҫылған, яҡшы сифатлы, аҡ, ҡара, бәҫ төҫтәрендә кейеҙҙәр барлыҡҡа килде. Күп көс, оҫталыҡ талап иткән хеҙмәт емештәренә һоҡланмау мөмкин түгел. Был оҫталыҡ дәресенә Сиҙер, Байғужа ауылдарынан ир-егеттәрҙең дә килеп ҡатнашыуы ҡыуаныслы хәл. Усаҡ яғып, кейеҙ баҫыу өсөн урындыҡ килтереп, һыу йылытып, баҫылған еүеш, ауыр кейеҙҙәрҙе өй беренсә таратып йөрөгән Әлфрит Мортаевҡа кейеҙ баҫыусылар рәхмәттәрен еткерҙе. Миләүшә Шаһыбал ҡыҙы үткәргән оҫталыҡ дәресе файҙалы һәм емешле булды. Сарала ҡатнашыусылар Йәмилә Байназарова, Сания Заһитова, Рәмилә Айытҡолова бешергән тәмле бутҡаны ашап, тәмле-татлы менән самауыр сәйе эсеп, күңелле итеп һөйләшеп, үҙҙәренең бөгөнгө оҫталыҡ дәресенән алған тәъҫораттары менән уртаҡлашып, киләсәккә пландар ҡороп, күңелдәре булып таралышты. Был кәрәкле, бөгөн әһәмиәтен юғалтмаған кейеҙ көнитешебеҙҙә урын алыр тигән өмөттә булайыҡ. Сараны ойоштороп, үткәреп, атҡарып сығыусыларға алдағы көндәрҙә эштәрендә уңыштар теләйек", - ти Флүрә Шәрәфетдинова. Киләсәктә Юлдыбай ағинәйҙәре сергетыш эшләү буйынса эш башларға йыйына. Уларҙың бар башланғыстарына тик уңыштар юлдаш булһын! Фото һәм текст сығанағы: Миләүшә Моратованың "Бәйләнештә"ге сәхифәһенән.