Әҙәбиәт һөйөүселәр өсөн яңы уҡыу йылы башланып торғанда матур яңылыҡ бар: шағирә, яҙыусы, тәржемәсе, Башҡортостан Республикаһының атҡаҙанған мәҙәниәт хеҙмәткәре, Һ. Дәүләтшина исемендәге дәүләт премияһы лауреаты, Салауат Юлаев ордены кавалеры Гөлнур Яҡупованың киң билдәле “Ҡатындар” романынң өҫтәмә өсөнсө тиражы донъя күргән. Романдың төп геройы – уҡытыусы ҡатын, ә әҫәрҙә мәктәп тормошондағы ваҡиғалар һүрәтләнә. Китаптың шулай уҡ рус телендәге варианты бар, ул "Женщины" тип атала һәм әҙәбиәт һөйөүселәр араһында бик популяр. Гөлнур Миҙхәт ҡыҙы уҡыусылар яратып уҡыған әҫәре тураһында түбәндәгеләрҙе билдәләй: - Уҡытыусылар - донъялағы иң мөһим, иң изге һөнәрҙәрҙең береһенә эйә булған шәхестәр. Тап уларҙы юғарылыҡҡа күтәреп, улар иңенә ятҡан мөҡәддәс бурыстарын күҙаллап, рәхмәтле тойғолар менән, йөрәгемде асып, рухи, әҙәби ҡеүәтемде һалып, өс романдан торған "Ҡатындар" трилогияһын ижад иттем. Сәбәбе ябай - үҙем дә белемем буйынса уҡытыусымын. Ни өсөн әҫәр "Ҡатындар" тип аталдымы? Уҡытыусы эшендә күпселек осраҡта ҡатын-ҡыҙ заты егелеп эшләй. Төп геройым Нурия, үҙәк образдар Әмин абый, Сәкинә апа һәм башҡалар - уҡытыусылар, ваҡиғалар мәктәп ерлегендә үҫеш ала. Трилогия Мәҙәниәт министрлығының "Башҡортостандың иң уҡымлы китабы" тигән дипломына лайыҡ булды. Ул 2013, 2015 йылдарҙа донъя күрҙе, әммә ихтыяж тулыһынса ҡәнәғәтләндерелмәне, халыҡ ун йылға яҡын минән китап һорап хаттар яҙҙы. Ошо көндәрҙә, Уҡытыусы һәм остаз йылы сиктәрендә, үҙ көсөм менән ҙур булмаған өҫтәмә тираж сығара алдым. Кемдәр китап алып өлгөрмәгән, миңә шәхсән мөрәжәғәт итә ала, - тине Гөлнур Яҡупова. Фотолар Гөлнур Яҡупованың шәхси архивынан.