Бөгөн Башҡортостан Башлығы Радий Хәбиров уҙғарған оператив кәңәшмәлә республиканың белем биреү учреждениеларында туҡланыуҙы ойоштороу мәсьәләһен тикшерҙеләр. Республиканың сауҙа һәм хеҙмәттәр министры Алексей Гусев әйтеүенсә, яңы уҡыу йылына уҡыусылар, шул иҫәптән дауалау һәм диетик туҡланыуға мохтаждар өсөн ике төп меню әҙерләнгән. Бынан тыш, балалар баҡсалары өсөн дә менюҙың ике варианты эшләнә. Был эш Мәғариф һәм фән министрлығы, Роспотребнадзорҙың Башҡортостан буйынса идаралығы менән берлектә ойошторолған. – Республиканың Социаль туҡланыу идаралығы белгестәре 431 тапҡыр уҡыу йорттарына мәктәптә туҡланыуҙы тикшерергә барҙы, – тине Алексей Гусев. – 2023 йылдың беренсе ярты йыллығы йомғаҡтары буйынса Нефтекама, Әлшәй, Белорет, Благовар, Салауат, Нуриман, Миәкә һәм Шишмә райондары туҡланыуҙы ойоштороуҙың юғары кимәлен күрһәтте. Министр хәбәр итеүенсә, Сауҙа һәм хеҙмәттәр министрлығы ҡарамағындағы һынау үҙәге лабораторияһы хеҙмәткәрҙәре аҙыҡ-түлек өлгөләрен тикшереүен дауам итә. 2023 йылда бөтәһе 2 417 өлгө сеймал һәм аҙыҡ-түлек тикшерелгән. Бында шулай уҡ санитар талаптарҙан тайпылыштарҙың кәмеүе күҙәтелә. Бынан тыш, мәктәп сайттарында көн һайын рациондың, менюҙың фотоһүрәттәре, аш-һыу әҙерләү өсөн файҙаланылған продукттар тураһында мәғлүмәт, туҡланыу мәсьәләләре буйынса кире бәйләнеш өсөн QR-кодтар урынлаштырыла. “Башҡортостан Республикаһының берҙәм белем биреү мөхите” системаһында ата-әсәләрҙең шәхси кабинеты аша ҡайнар аш менән туҡланыу сифатын контролдә тотоу системаһы тулы ҡеүәтенә эшләй. Мәғариф һәм фән министры Айбулат Хажин һүҙҙәренсә, әлегә уҡыусыларҙан һәм уларҙың ата-әсәләренән мәктәп туҡланыуына ялыуҙар килмәне. Мөрәжәғәт килеп тыуғанда ата-әсәләр уларҙы шәхси кабинеттар аша ебәрә ала, тип билдәләне ул. Башҡортостан Башлығы Радий Хәбиров тиҙ арала мәктәп туҡланыуы сифатына ҡағылышлы бөтә мөрәжәғәттәрҙе эшкәртергә ҡушты. Фото: Башҡортостан Башлығы сайты.