Яҡтыраҡ та, арзаныраҡ та

Бөгөн Башҡортостан Башлығы Радий Хәбиров уҙғарған оператив кәңәшмәлә республиканың ауыл-ҡалаларында энергия һөҙөмтәлелегенең артыуын тикшерҙеләр. Был йүнәлештә ҙур проекттар Өфө биләмәһендә тормошҡа ашырыла. Ҡала хакимиәте башлығы Ратмир Мәүлиев әйтеүенсә, республиканың баш ҡалаһында энергосервис контрактының пилот проекты 2022 йылда Дим районында эшләй башлаған. Һөҙөмтәлә 3,5 мең яҡтыртҡысты алмаштырыу энергия ҡулланыу күләмен ярайһы уҡ кәметеү һәм бер йылда 5,5 миллион һумдан ашыу аҡса экономиялауға өлгәшелгән. 2023 йылдан алынған тәжрибәне бөтә Өфө биләмәһендә тараталар. Планда – энергия сервисы килешеүе сиктәрендә 44,9 мең яҡтыртҡысты алмаштырыу. Компания-инвестор үҙ иҫәбенә бөтә эштәрҙе башҡарасаҡ һәм яңы ҡорамалдарҙы муниципалитет милкенә тапшырасаҡ. Инвесторҙың сығымдарын электр энергияһын түләүгә экономияланған аҡсанан ҡаплайҙар. Контракт ваҡыты – алты йыл. Бынан һуң яҡтыртҡыстарға гарантия тағы ике йыл дауам итәсәк, ул ҡаланы яҡтыртыуға сығымдарҙы кәметергә мөмкинлек бирәсәк. Сентябрь башына Өфөлә 14 меңдән ашыу яҡтыртҡыс алмаштырылған. Эштәр, атап әйткәндә, Салауат Юлаев һәм Октябрь проспектында, Сипайлово, Инорс, Затон, Черниковка һәм Нижегородка биҫтәләренең шәхси сектор урамдарында тамамланған. Бынан тыш, балалар баҡсаларына һәм мәктәптәргә лә иғтибар бүленгән. – Социаль учреждениеларға барыу урындарын яҡтыртыуҙы яҡшыртыу, шулай уҡ транспорт объекттарында күренеүҙе арттырыу баш ҡалала йәшәүселәр өсөн хәүефһеҙ ҡала киңлеген булдырырға мөмкинлек бирәсәк, – тине Ратмир Мәүлиев. – Контракт ваҡыты тамамланғас, ҡала өсөн йылына 100 миллион һумдан ашыу аҡса экономияланасаҡ, тип күҙаллана. Башҡортостан Башлығы республика Хөкүмәтенә муниципалитеттарҙа урамдарҙы яҡтыртыуҙы яңыртыу мәсьәләләрен өйрәнергә һәм йыл йомғаҡтары буйынса Өфөнөң һәм Нефтекаманың уңышлы тәжрибәһен таратыу тураһында доклад менән сығыш яһарға ҡушты. – Бындай ҡараштың тәү сиратта ҙур ҡалалар өсөн көнүҙәк булыуы аңлашыла, – тине Радий Хәбиров. – Әммә был эште башҡарырға кәрәк, беҙҙә әле яҡтыртылмаған урамдар бар. Эшләргә урын бар. Фото: Башҡортостан Башлығы сайты.