Аргентинаға бала табырға киткән яҡташыбыҙ һәләк булған

“База” телеграм-каналы ауыр хәбәр еткерҙе: Аргентинала бала табырға тип барған Өфө ҡатыны үле килеш табылған. 29 йәшлек Елена (исеме үҙгәртеп алынды) 2022 йылдың сентябрендә кейәүгә сыҡҡан. Күп тә тормай ире Тимур (шулай уҡ исеме үҙгәртелде) ситкә йәшәргә китергә тәҡдим итә. Тәүҙә улар Грузияға бара, аҙаҡ Төркиәгә. Ә Елена ауырға ҡалғас, Аргентинаға барып, бала табырға ҡарар итәләр. Сит илдә ҡатын балаһын таба, ә унан һуң тыуған иленә ҡайтҡыһы килә башлай. Тик ире быға ҡаршы була. Һөҙөмтәлә ғаиләлә йыш ҡына низағтар сыға башлай. Сираттағы талаштан һуң ҡатын бәләкәй балаһы менән бергә тәҙрәнән ҡолап төшә һәм һәләк була. Ир әйтеүенсә, Еленаның бала тапҡандан һуңғы депрессияһы була, тик урындағы полиция вәкилдәре быға ышанмай һәм ҡатындың үлемендә иренең дә ҡыҫылышы бар тигән фаразды тикшерә. Еленаның туғандары ла уның бер ҡасан да үҙенә ҡул һалыуы тураһында уйҙары булыуын белмәй, ул һәр саҡ позитив кеше булған. Һуңғы тапҡыр улар 26 августа аралашҡан. Ул көндө ҡатын был кешегә кейәүгә сыҡҡанына үкенеүен белдергән. Һәм күп тә үтмәй һәләк була... Ҡатындың ғаиләһенең ауыр ҡайғыһын уртаҡлашабыҙ. Фото: "База" телеграм-каналы.