Бөгөн билдәле йырсы Радик Юлъяҡшин (Элвин Грей) үҙенең социаль селтәрендә күңелһеҙ яңылыҡты хәбәр итте. Был хәл кисә, 2 сентябрҙә, Татарстандың Әлмәт ҡалаһында булған. “Ҡаланан ауыр тойғолар менән китәм. Әле миндә хис-тойғолар өҫтөнлөк итә, тик ҡоро ғына яҙырға тырышам. Тәүҙә минең сығышымды 30 минутҡа тиклем ҡыҫҡарттылар һәм тере музыка файҙаланыуҙы тыйҙылар. Концерт башланыуға 15 минут ҡалғас, нисек тә булһа алдан һөйләшкән бер сәғәтлек программаны һәм 14 йырҙы раҫланылар. Шулай уҡ музыканттарҙы йәлеп итергә рөхсәт булды. Тик концерт бөтөүгә туғыҙ минут ҡалғас, йәберле һүҙҙәр, ғәйепләүҙәр менән концертты өҙҙөләр. Тамашасыларға ҡарата бындай мөнәсәбәтте сәхнәләге 20 йыл эсендә тәүге тапҡыр күрәм”, – тип яҙҙы ул. Йырсы тамашасылары алдында ғәфү үтенгән, сөнки күптәр яратҡан йырҙарын ишетмәй ҡалған. Бында ул ике ойоштороусы ҡатынды ғәйепләгән. Шулай уҡ Элвин Грей Әлмәттә ҙур хәйриә концерты ойошторорға вәғәҙә иткән. Әйткәндәй, тамашасылары социаль селтәрҙәрҙә йырсы ғәйепле түгел тигән һәм хәлде аңлап ҡабул итеүҙәрен белдергән. Фото: Элвин Грейҙың социаль селтәренән.