Бәүелдә ниндәй тоҙҙар барлығын үҙеңә лә тикшереп белергә була. Олоғайған һайын организмда тоҙҙар ултыра. Һөҙөмтәлә теге йәки был ауырыуҙар барлыҡҡа килә. Туҡланыуҙы яйға һалып, хәлде күпкә еңеләйтергә мөмкин, әммә нисегерәк һуң? Тоҙҙар ҙа бит төрлө була. Бының өсөн тәүҙә үҙеңдең һейҙек анализын тикшерергә кәрәк. Иртән ашағанға тиклем быяла банкаға кесе ярау итеп, бер тәүлеккә ҡалдырырға. Ул шулай ултырып тонғас, һауыт төбөндә барлыҡҡа килгән һарҡынтыны ҡарарға, тикшерергә. Шыйыҡсаның ниндәй булыуына ҡарап, туҡланыуҙы үҙгәртергә була. Әлбиттә, бөтә төрлө тоҙҙар ултырғанда ла әсе, тоҙло, ҡурылған, консерваланған ризыҡтар, ҡырҡыу тәмләткестәр ярамай. Ә һыуҙы ике литрҙан да кәм эсмәҫкә. ФОСФАТ ТОҘҘАР. Банкаға йыйғас та, бәүел болғансыҡ була. Бер тәүлектән ваҡ үтә күренмәле кристалдар рәүешендә төпрә ултыра. Был организмда инфекция барлығын - бәүел ҡыуығы (цистит) ялҡынһыныуын, ашҡаҙан-эсәк юлы эшмәкәрлеге боҙолоуын, ағыуланғанда һыуһыҙлыҡты йә гормональ фондағы тайпылыштарҙы аңлата. Туҡланыуҙа һөт һәм ҡамыр ризыҡтарын, яңы бешкән икмәкте, тәбиғи һуттарҙы, лимон, кишер, редис, сөгөлдөр, ҡыяр, помидор, кәбеҫтә, һарымһаҡ, әфлисун, мандарин, лимон, ҡарбуз, ҡауын, абрикос, персик, йәшел тәмләткестәр, йәшел һәм үлән сәйҙәрен сикләргә кәрәк. КАРБОНАТ ТОҘҘАР. Бәүел аҡ төҫтә, һарҡынтыһы ла аҡ була. Ул организмдағы инфекция сирҙәрен - пиелонефрит, цистит, бөйөр һәм һейҙек юлдары үҫешендәге тайпылыштарҙы күрһәтә. Туҡланыуҙа айырыуса һөт, йогурт, эремсек, сырҙы аҙыраҡ ҡулланыу талап ителә. УРАТ ТОҘҘАР. Бәүел йыйылған һауыт стеналарына һары һәм ҡыҙғылт төҫтәге кристалдар булып ултыралар. Ғәҙәттә, юғары ҡан баҫымы, артыҡ тән ауырлығы, подагра, псориаз һәм онкология сирҙәренән яфаланған кешеләрҙең анализына хас был. Был бәүел кислотаһын ҡайһы бер дарыуҙарҙы күп эсеү ҙә арттырып ебәрә. Мәҫәлән, аспирин, никотин кислотаһы, һейҙек ҡыуҙырыусы матдәләр. Урат тоҙҙары күп булғанда бигерәк тә малдың эсәк-ҡарынын, бауыр-йөрәген, телен, шулай уҡ балыҡ консервалары, йәш ит ашарға ярамай. Бешкән ит рөхсәт ителә, тик һурпаһын эсмәҫкә, сөнки бешергәндә иттәге пуриндар уға күсә. Алкоголле эсемлектәр, айырыуса һыра ҡәтғи тыйыла. Шуныһы өмөтләндерә: бөтә тоҙҙар араһында тик ураттарҙы ғына минераль һыу ҡулланып иретергә була. Ай буйына эсеп, ваҡ таштарҙан ҡотолорға, эреләренең үлсәмен кәметергә мөмкин. ОКСАЛАТ ТОҘҘАР. Бәүел анализында улар ҡуйы ҡыҙыл йәки ҡара төҫтә күренә. Был тоҙҙар организмда ҡуҙғалаҡ һәм аскорбин кислоталары артыҡ булғанда, ә В6 витамины һәм кальций етмәгәндә, пиелонефрит, бауыр циррозы, шәкәр диабеты, остеопороз, колит менән яфаланғанда барлыҡҡа килә. Туҡланыуҙа һурпа, эсәк-ҡарын, бауыр-йөрәк, шоколад, какао, шалҡан, сөгөлдөр, ревень, ҡуҙғалаҡ, петрушка, йәшел салат тыйыла. ИҒТИБАР! БЫЛ ЯҘМА АУЫРЫУҘАРҘЫ ДАУАЛАУҒА ҠУЛЛАНМА ТҮГЕЛ, Ә ТАНЫШТЫРЫУ МАҠСАТЫНАН ҒЫНА БИРЕЛДЕ. ДАУАЛАНЫУ АЛЫМДАРЫ ТУРАҺЫНДА ДАУАЛАУСЫ ТАБИП МЕНӘН КӘҢӘШЛӘШЕРГӘ КӘРӘК. Гөлдәр БҮЛӘКБАЕВА. Фото: fonwall.ru