Билдәле гимнаст, яҡташыбыҙ Ләйсән Үтәшева социаль селтәрҙәге шәхси сәхифәһендә уҡыу йылы башланыуға бәйле пост ҡалдырған һәм йылы хәтирәләре менән уртаҡлашҡан. “Минең тәүге 1 сентябрь көнө ошолай булды: 1992 йыл, Волгоград, инглиз телен тәрәндән өйрәтеүсе 50-се гимназия. Үҙем менән хәтәр ғорурланғанымды хәтерләйем, сөнки был мәктәп ҡалала иң яҡшыларҙың береһе тип һанала һәм унда йә һәләтле, йә аҡсалы ата-әсәләрҙең балалары уҡый ине. Беҙҙең ғаилә әллә ни етешлек менән айырылмай, үҙемде иһә бик һәләтлегә лә һанамай инем, мәгәр уҡытыусыларға минең инглиз телендә һөйләшеүем бик оҡшаны һәм шуға мәктәпкә ҡабул иттеләр. Әйткәндәй, тел менән мин тормош юлында бер ваҡытта ла шөғөлләнмәнем... Класта берҙән-бер башҡорт булыуымды иҫләйем һәм шунда уҡ исеме минекеләй ғәҙәти булмаған ҡыҙ менән дуҫлашып алдым: Гаянэ исемле ҡыҙ әрмән милләтенән ине. Беҙҙе бер кем дә ҡыйырһытманы. Йорт ихатаһында исемем өсөн ҡайһы саҡта эләгә ҡалһа, мәктәптә бөтәһе лә итәғәтле булды. Хәйер, миңә яҡынлап та булмағандыр, сөнки Гаянэнан тыш, кластағы бөтә малайҙар менән дә дуҫлашып алдым. Үҙемдең футбол командаһы менән “казак-юлбаҫарҙар” уйынын уйнар, ә мин һәммәһен әсәй әҙерләгән манты менән һыйлар инем (йәштәргә нисек ярарға белгәнмен). Шуны хәтерләйем, баштан уҡ математиканан яҡшы һөҙөмтә күрһәттем, ә бына рус теле менән бәлә ине: телем уның менән асылмаған. Мин бала саҡтан тик башҡортса һөйләштем һәм уҡыным. Ә беренсе диктантты «аб-тека» тип яҙҙым: нисек теләйһегеҙ, шулай аңлағыҙ. Барыһын да – өлкәндәрҙе һәм айырыуса балаларҙы уҡыу йылы башланыу менән ҡотлайым. Белем көнө менән ҡотлайым. Һуңғы ирекле көндәр (2, 3 сентбрь ял көндәренә тура килгәнен әйтәм) менән ләззәтләнеп ҡалығыҙ һәм алға - белем гранитын “кимерергә”. Был ваҡыттың ҡәҙерен белегеҙ һәм олоғайырға ашыҡмағыҙ!”, - тип яҙған Ләйсән. Уға һәм уның яҡындарына уңышлы уҡыу йылы теләйбеҙ! Фото: Ләйсән Үтәшеваның шәхси сәхифәһенән.