Ғаилә экопаркын, шулай уҡ ике кемпингты киңәйтеү буйынса туристик инвестиция проекттары Башҡортостан Республикаһының Баймаҡ районында «Туризм һәм ҡунаҡсыллыҡ индустрияһы» милли проекты (нацпроекту «Туризм и индустрия гостеприимства») ярҙамында тормошҡа ашырыла, тип хәбәр иттеләр төбәктең Эшҡыуарлыҡ һәм туризм министрлығында. "Туристик тармаҡ-Башҡортостан иҡтисадының өҫтөнлөклө йүнәлештәренең береһе. Тармаҡты үҫтереү өсөн ошо өлкәлә үҙ эшмәкәрлеген алып барған эшҡыуарҙарға ярҙам итеү мөһим. „Туризм һәм ҡунаҡсыллыҡ индустрияһы“ милли проекты ярҙамында республикала инфраструктура объекттары булдырыласаҡ, улар төбәгебеҙгә тағы ла күберәк туристарҙы йәлеп итергә мөмкинлек бирәсәк», — тип билдәләне Республиканың Эшҡыуарлыҡ һәм туризм министры Рөстәм Афзалов. Гранттар ярҙамында Баймаҡ районында бер юлы өс туристик инвестиция проекты тормошҡа ашырыласаҡ. Бында «Бәхет шишмәһе» ғаилә экопаркы биләмәһендә алты модулле өй төҙөләсәк, 10 модулле өйҙән торған «Ирәндек» кемпингы, шулай уҡ 12 тирмәнән торған «Ғәлиев» кемпингы ойоштороласаҡ. Өс инвестиция проектын тормошҡа ашырыуҙың дөйөм хаҡы — 87,5 миллион һум, шуның 12,6 миллион һумы дәүләт ярҙамы суммаһы буласаҡ. Туризм һәм ҡунаҡсыллыҡ индустрияһы милли проекты 2030 йылға Рәсәй буйлап сәйәхәттәр һанын йылына 140 миллионға тиклем арттырыуҙы, шулай уҡ туристик тармаҡтың мультипликативлығы иҫәбенә илдә иҡтисади үҫеште тәьмин итеүҙе күҙ уңында тота. Милли проект Рәсәй буйлап сәйәхәттәрҙе уңайлы, хәүефһеҙ һәм ҡыҙыҡлы итергә ярҙам итәсәк. РФ Президенты Владимир Путин инициативаһы менән милли проекттар 2019 йылда старт ала. Башҡортостанда дәүләт ярҙамы менән экопарктар һәм кемпингтар төҙөлә.