“Авангард” уҡыу-методика үҙәгенең Рәсәй Геройы М.В. Серафимов исемендәге “Патриот” паркында әленән-әле төрлө ҡыҙыҡлы саралар, ярыштар үткәрелеп тора. Ошо көндәрҙә унда Бөтә Рәсәй “Хәүефһеҙлек мәктәбе” балалар-үҫмерҙәр ижтимағи хәрәкәтенең Башҡортостан төбәк бүлексәһе профилле смена ойошторҙо. Республика мәктәптәренән 230-ҙан ашыу баланы берләштергән башланғыс Мобиль отрядтар мәктәбе уҡыу программаһына ярашлы ғәмәлгә ашырылды. Уның барышында үҫмерҙәр хәүефһеҙлек нигеҙҙәренә һәм тәүге ярҙам күрһәтеү нескәлектәренә төшөндө. Профилле смена Башҡортостан Республикаһы Башлығы гранттары фонды, БР Мәғариф һәм фән министрлығы, Рәсәй Ғәҙәттән тыш хәлдәр министрлығының Башҡортостан буйынса баш идаралығы, БР Ғәҙәттән тыш хәлдәр буйынса дәүләт комитетының булышлығында ойошторолдо. Уҡыусылар бер аҙна дауамында тәбиғәттә һәм ҡала шарттарында хәүефһеҙ йәшәү алымдарына, тәүге медицина ярҙамы күрһәтеү нескәлектәренә төшөндө, төрлө саралар ойошторорға өйрәнде, “тормош хәүефһеҙлеге” йүнәлешендәге һөнәрҙәр менән танышты. Ҡатнашыусылар “Геройҙар уҙышы” трассаһын үтте, хәрби һәм янғын техникаһы күргәҙмәләрен ҡараны, Башҡортостанда юғалған кешеләрҙе эҙләү үҙәгенең “Хәүефһеҙлек марафоны” квесында ҡатнашты, “Тиң диалог” алымында Рәсәй Ғәҙәттән тыш хәлдәр министрлығының Башҡортостан буйынса баш идаралығы хеҙмәткәрҙәре менән аралашты. Шулай уҡ үҫмерҙәр топография фәне, уҡ атыу, хәрби марш, үҙ-үҙеңде һаҡлау, спорт туризмы нескәлектәре менән танышты. Сараларҙы һәм күнекмәләрҙе “Һинең хәүефһеҙ урының” компетенциялар оҫтаханаһы” проекты инструкторҙары һәм “Авангард” йәштәрҙе хәрби-патриотик тәрбиәләү уҡыу-методика үҙәге командаһы үткәрҙе. Әйткәндәй, әлеге проект Башҡортостан Башлығы гранты иҫәбенә тормошҡа ашырыла. Сменаны ябыу тантанаһында Мәскәү ҡалаһынан ҡунаҡ – “Хәүефһеҙлек мәктәбе” хәрәкәтенең үҙәк советы рәйесе Надежда Ершова, шулай уҡ БР мәғариф һәм фән министры урынбаҫары Инесса Косолапова, Рәсәй Ғәҙәттән тыш хәлдәр министрлығының Башҡортостан буйынса баш идаралығы начальнигы урынбаҫары Владимир Горин, Ғәҙәттән тыш хәлдәр буйынса дәүләт комитеты рәйесе Кирилл Первов ҡатнашты. – Ведомстволар вәкилдәре һәм “Авангард” үҙәге командаһы менән берлектә балаларға тормошта бик кәрәкле белем һәм шөғөлдәргә эйә булыу өсөн мөмкинлек тыуҙырырға тырыштыҡ. “Һинең хәүефһеҙ урының” компетенциялар оҫтаханаһы” проекты һәм уға ярашлы ойошторолған саралар йәш быуынды рухи һәм физик йәһәттән сәләмәт, изге күңелле, эргә-тирәһендәге кешеләрҙе һәм тәбиғәтте төрлө хәүеф-хәтәрҙән һаҡлауға һәләтле шәхестәр итеп тәрбиәләүҙе маҡсат итеп ҡуя, – тине “Хәүефһеҙлек мәктәбе”нең Башҡортостан төбәк бүлексәһе советы рәйесе Гөлшат Әхмәҙиева. Гөлдәр ЯҠШЫҒОЛОВА