Һәр уңыш эшкә дәрт өҫтәй

Республикабыҙҙа Берҙәм дәүләт имтиханын 100 балға тапшырған уҡыусыларҙы әҙерләгән уҡытыусыларға аҡсалата Башҡортостан Башлығы премияһы тапшырылып килә. Был уҡытыусы һөнәренең абруйын күтәреү һәм педагогтарҙың эшмәкәрлеген дәртләндереү маҡсатында эшләнә. Быйыл республикала 79 сығарылыш уҡыусыһы БДИ-ны 100 балға тапшырған. Юғары һөҙөмтәгә өлгәшкән сығарылыш уҡыусыларын әҙерлә­гән уҡытыусылар араһында Республика инженер лицей-интерна­тының информатика уҡытыусыһы Вадим Ринат улы Ниғмәтуллин да бар. Ул бына инде 15 йыл дауамында ошо белем усағында ҡыҙ һәм егеттәрҙе программалау серҙәренә өйрәтә. Вадим Ринат улы Салауат ҡала­һында тыуған, әммә бала сағы һәм мәктәп йылдары Стәр­лета­маҡта үтә. Ошо ҡалалағы 3-сө Башҡорт лицей-интернатын уңыш­лы тамамлай. Артабан Өфө яғыулыҡ-энергетика колледжында уҡып, электрик һөнәренә эйә була. “Әммә производстволағы эш минеке түгеллеген аңланым. Күңел уҡытыусылыҡҡа тартылды. Был аңлашыла ла, сөнки педагогтар нәҫелен дауам итеүсемен: ҡартатайым, әсәйем, инәйем, ағайым – уҡытыусылар”, – тип һөйләне Вадим Ринат улы. Шулай итеп, ошо ынтылыш уны Стәрлетамаҡ дәүләт педагогия академияһына (бөгөн – Өфө дәүләт фән һәм технологиялар университетының филиалы – автор) алып килә. Бында информатика йүнәлешен һайлай. Юғары белемле белгес хеҙмәт юлын әлегәсә эшләп йөрөгән Республика инженер лицей-интернатында башлай. Йәш уҡытыусы баштан уҡ уҡыусылар менән шәх­сән эшләүгә, уларҙың һәләттәрен үҫтереүгә иғтибар бирә. – Информатика дәресендә һәр уҡыусы менән айырым эшләү өсөн мөмкинлектәр ҙурыраҡ, сөнки дәрес ваҡытында класс икегә бүленә, һәр төркөмдә – яҡынса 12-13 бала. VII класс тирәһендә балаларҙың һәләт­тәрен асыҡлап, шәхсән шөғөл­ләнеү эше башлана. Төрлө олимпиадаларға, ярыштарға йөрөйбөҙ, уҡыусыларым менән Мәскәү, Санкт-Петербург, Екатеринбург, Ҡазан ҡалаларында булғаныбыҙ бар. IX класс тирә­һендә уларҙа үҙ көсөнә ышаныс барлыҡҡа килә, ярыштарҙан, олимпиадаларҙан ҡурҡмай баш­лайҙар. Шулай итеп, Берҙәм дәүләт имтиханына ла эске ныҡлыҡ, ихтыяр көсөнә эйә булып аяҡ баҫалар һәм яҡшы һөҙөм­тәләргә өлгәшәләр, – ти В.Р. Ниғмәтуллин. Вадим Ринат улының эш практикаһында быға тиклем дә информатиканан БДИ-ны 100 балға тыпшырыусылар булған. Быйыл ошо юғары һөҙөмтәгә өлгәшкән Искәндәр Сәйфуллин – өсөнсө уҡыусыһы. “Уҡыусыла­рымдың уңыштарына шатмын, һәр яҡшы һөҙөмтә эшкә дәрт өҫтәй, хеҙмәтеңдең татлы емеше кеүек ҡабул ителә”, – ти уҡытыу­сы. Ул лицей-интернатта яҡшы һөҙөмтәләргә ынтылып эшләү өсөн тейешле шарттар булдырылыуын, айырыуса остазлыҡ мәктәбенең юғары кимәлдә булыуын билдәләне. Бында уҡыу­сыларға дөрөҫ һөнәри йүнәлеш биреү эшенә элекке сығарылыш уҡыусылары ла йәлеп ителә, улар төрлө сараларҙа әүҙем ҡатнаша, уҡытыусыларға ихлас ярҙам итә. Вадим Ринат улы – күп балалы ғаилә башлығы. Тормош юлдашы Фирүзә менән улар дүрт бала тәрбиәләйҙәр. Ҡыҙҙарына – Фәриҙә, Әминә, Сафия, улдарына Али тигән матур мәғәнәле исемдәр ҡушҡандар. Уларҙы яҡшы кеше, булдыҡлы шәхес итеп үҫтерергә тырышалар. Әйткәндәй, Вадим Ринат улының ҡатыны Фирүзә лә – математика уҡытыусыһы, әлегә ул декрет ялында. Ниғмәтуллиндарҙың татыу, күркәм ғаиләһе Өфө ҡалаһында үҙ фатирында йәшәй. Өсөнсө сабыйҙары тыуғас, күп балалы ғаиләләргә тәғәйен программала ҡатнашып, 1 миллион 300 мең һумлыҡ торлаҡ сертификаты алыуға өлгәшкәндәр. Кинйәкәй­ҙәре Али тыуғас, дәүләттән ипотека кредитын ҡаплауға 450 мең һум аҡса бүленгән. Йәш ғаилә ошондай ярҙам сараларынан ҡәнәғәт. Һәләтле уҡытыусы Вадим Ринат улына эшендә уңыштар, яңынан-яңы ҡаҙаныштар, ғаилә­һенә именлек, һаулыҡ теләйбеҙ! Гөлдәр ЯҠШЫҒОЛОВА