Уҡытыусылар балаларҙы уҡытып һәм тәрбиәләп кенә ҡалмай, уларға белемен, көсөн, ваҡытын, ә иң мөһиме – күңелен бирә. Баш ҡалабыҙ мәктәптәрендә лә үҙ эшен яратҡан, һөнәренең оҫтаһы булып танылған педагогтар тупланған. Өфөләге 58-се лицейҙың башҡорт теле һәм әҙәбиәте уҡытыусыһы Әлфиә Ғәзизова ла – тап шундай остаздарҙың береһе. – Һөнәр һайлағанда педагогика йүнәлешенә өҫтөнлөк биргән апайҙарымдың тәьҫире көслө булды, шуға күрә мәктәпте тамамлағас, М. Аҡмулла исемендәге Башҡорт дәүләт университетына уҡырға индем, – ти Әлфиә Рәүеф ҡыҙы. 2003 йылда уҡыу йортоноң башҡорт филологияһы факультетын уңышлы тамамлаған юғары белемле белгес уҡытыусы булып эш башлай һәм бына 19 йыл яратҡан һөнәренә тоғро ҡала. – Кешене уҡытыу, тәрбиәләү, үҫтереүҙе үҙеңдән башларға кәрәк. Шул саҡта ғына ыңғай һөҙөмтәгә өлгәшергә мөмкин. Эшемдең балалар менән бәйле булыуы ныҡ оҡшай, сөнки улар – бөтмәҫ энергия, көс-дәрт сығанағы. Үҫмерҙәрҙәге сикһеҙ ҡыҙыҡһыныу, яңыны белергә теләү һине лә үҫешкә әйҙәй, – тип хеҙмәтенең