Бөгөн илебеҙҙә ҙур байрам – Белем көнө. Меңәрләгән малайҙар һәм ҡыҙҙар тәүге тапҡыр мәктәп ишеген асып инеп, серле лә, мауыҡтырғыс та, ауыр ҙа, ҡыҙыҡлы ла ғилем донъяһына аяҡ баҫты. Каникулда бер-береһен һағынып өлгөргән башланғыс, өлкән класс уҡыусылары белем усағына юл алды. Уҡытыусылар яңы уҡыу йылының тәүге дәресен башлап ебәрҙе. Рәми Ғарипов исемендәге 1-се Башҡорт республика гимназия-интернатында ла Белем көнөнә арналған тантана сағыу, матур байрам итеп үткәрелде. Рәсәй һәм Башҡортостан гимндары аҫтында гимназия-интернаттың уҡыу алдынғылары – XI класс уҡыусылары Рушан Дәүләтшин, Алтынай Атанғолова, Вилдан Мәжитов Рәсәй Федерацияһы, Башҡортостан Республикаһы һәм гимназия-интернат флагтарын күтәрҙе. Уҡыусыларға, уҡытыусыларға, мәғариф ветерандарына, ата-әсәләргә Башҡортостан Башлығы Хакимиәте етәксеһенең эске сәйәсәт буйынса беренсе урынбаҫары Урал Таһир улы Килсенбаев, Рәми Ғарипов исемендәге 1-се Башҡорт республика гимназия-интернаты директоры Илнур Рифат улы Салихов, Өфө федераль тикшеренеүҙәр үҙәгенең Тарих, тел һәм әҙәбиәт институты директоры, дәүләт эшмәкәре Зөһрә Йыһаннур ҡыҙы Рәхмәтуллина ихлас ҡотлау һүҙҙәрен еткерҙе. Шулай уҡ тантанала бихисап абруйлы ҡунаҡтар ҡатнашты. - Рәми Ғарипов исемендәге Башҡорт республика гимназия-интернаты уҡыусылары VII кластан XI класҡа тиклем генә түгел, ошо белем усағын тамамлап, юғары уҡыу йорттарына ингәс тә, артабан тормошта үҙ урындарын табып, төрлө өлкәләрҙә эшләгәндә лә “Беренселәр” булып ҡала һәм ғүмер дауамында бер-береһенә терәк булып йәшәй. Бында айырым рух, тәрбиә алымы барлығы бер кемгә лә сер түгел, ул гимназия биләмәһенә инеү менән тойола, күренә, иң мөһиме – балаларҙың янып торған ҡарашында сағыла, - тип билдәләне Урал Таһир улы сығышында. Ул шулай уҡ йәш шайморатовсыларға көндәлектәр тапшырҙы. Генерал Шайморатовтың тормошона һәм хәрби юлына ҡағылышлы мәғлүмәт тупланған иҫтәлекле бүләкте Герой исемен йөрөткән VII “Г”, VIII “Г” һәм IX “Г”кластары старостары сығып алды. Бер төркөм мәғариф хеҙмәткәрҙәре һәм уҡыу алдынғылары юғары кимәлдәге бүләктәр менән билдәләнде. Оло хөрмәткә лайыҡ тәрбиәсе Рим Муллағәле улы Ғәббәсов, уҡытыусы Тимрас Ҡәнзәфәр улы Йылҡыбаев, гимназия директоры урынбаҫары Яҡуп Рид улы Хафизов, шулай уҡ уҡыу алдынғылары Алтынай Атанғолова һәм Рушан Дәүләтшин Башҡортостан Башлығының Рәхмәт хатына лайыҡ булды. Байрамды “Гөлнәзирә” өлгөлө балалар бейеү ансамбле, “Гәлсәр” вокал ансамбле, элекке сығарылыш уҡыусыһы Ғәзиз Әминевтең дәртле сығыштары биҙәне. Автор фотолары.