“Башҡортостан” гәзите редакцияһында йәшәп килгән матур традицияға тоғро ҡалып, быйыл ике хеҙмәттәшебеҙҙең балаһын – Камила Минғәлиева менән Тимур Зәйнетдиновты I класҡа – ҙур һәм сикһеҙ белем донъяһына аяҡ баҫыуы менән тәбрикләйбеҙ. Тимур – редакцияның социаль өлкә бүлеге мөдире Айһылыу Низамованың улы. “Алтын ҙур булмай” тигәндәй, бәләкәй булыуына ҡарамаҫтан, бихисап һөнәрҙәре, шөғөлдәре бар егеттең. Балалар баҡсаһында уҡ тхэквондо, футбол секцияһына йөрөгән, ғаиләһе менән саңғыла, велосипедта елергә, йүгерергә ярата. “Футбол ныҡ оҡшай, мәктәптә лә секцияға яҙылам. Уҡыуға барырға алдан уҡ әҙерләнеп бөттөк. Портфелде үҙем һайланым”, – ти Тимур. Ул Шамонин ауылындағы урта мәктәптең I “Г” класына бара. Бер йылға яҡын ошо белем усағына әҙерлек курсына йөрөгән, буласаҡ уҡытыусыһы Фәнилә Хәйруллинаны ла бик оҡшатҡан. Әйткәндәй, Фәнилә Фәхрислам ҡыҙы – өс тиҫтә йыллыҡ бай тәжрибәгә эйә уҡытыусы, мәктәп директорының уҡытыу-тәрбиә эштәре буйынса урынбаҫары, Башҡортостандың мәғариф отличнигы. – Улымды тыныс күңел менән I класҡа алып барам. Апаһы Камилла ла ошо мәктәптә белем ала. Белем усағыбыҙ ҙа, уҡытыусылар ҙа бына тигән, – ти коллегабыҙ Айһылыу Низамова. Камила – журналист Әлфиә Минғәлиеваның ҡыҙы. Былтыр йәш ғаилә өлкән ҡыҙҙары Юлиәне мәктәпкә алып барғайны, быйыл иркә генә Камила ла апаһы уҡыған 1-се Республика полилингваль күп профилле гимназияһына юллана. Иркә тиһәк тә, уҡый ҙа, яҙа ла, һанай ҙа белә булып сыҡты ҡыҙыҡай. Ул да үҙе уҡыясаҡ гимназияла әҙерлек төркөмөндә шөғөлләнгән. “Унда түңәрәктәр, секциялар күп. Мин балалар баҡсаһында шахмат, инглиз теле түңәрәгенә йөрөнөм, ә гимназияла һүрәт төшөрөү һәм робот техникаһына яҙылдым”, – тип һөйләне Камила. Ул беҙгә Белем көнөнә арналған тантанаға тип ятлаған шиғырын да һөйләп ишеттерҙе. “Хәрефтәр ҙә өйрәнербеҙ, Һүҙҙәр төҙөп уҡырбыҙ. Һағынып көткән мәктәптә беҙ Бик күп дуҫтар табырбыҙ!” Беренсе уҡытыусыһы Гүзәл Рим ҡыҙы ла Камиланың тырышлығын билдәләне, маҡтап, арҡаһынан һөйөп алды. Беҙ уның менән дә яҡынданыраҡ таныштыҡ. Гүзәл Рим ҡыҙы Кәримова 1-се Республика полилингваль күп профилле гимназияһында бишенсе йыл эшләй. Был уның икенсе сығарылыш класы буласаҡ. Ә дөйөм алғанда ул – 25 йыллыҡ хеҙмәт стажына эйә оло хөрмәткә лайыҡ педагог. Өфө ҡалаһында тыуып үҫкән ханым тәүҙә баш ҡалалағы педагогия училищеһын, һуңынан Башҡорт дәүләт педагогия институтын тамамлай. – Уҡытыусы һөнәрен һайлағаныма бер ҡасан да үкенгәнем булманы. Эшем ныҡ оҡшай, сөнки балаларҙы яратам. Улар янында донъя мәшәҡәттәре онотола, шул саф күңелле ҡыҙҙар-малайҙар ыңғайына бәләкәй генә шатлыҡтарға ҡыуанаһың, бергә үҫәһең, уңыштарын күреп, дәртләнәһең, – ти юғары категориялы уҡытыусы. Бөгөн белем донъяһына аяҡ баҫҡан бәләкәстәргә – аҡ юлдар, барлыҡ мәктәп уҡыусыларына – тырышлыҡ һәм ныҡышмалылыҡ, ә уҡытыусыларға – уңыштар, яңынан-яңы ҡаҙаныштар теләйбеҙ! Нәсих Хәлисов фотоһы. Фотола: 1-се Республика полилингваль күп профилле гимназия уҡытыусыһы Гүзәл Кәримова I класс уҡыусылары Камила Минғәлиева һәм Тимур Зәйнетдинов менән.