"Банка эсендә уңыш" конкурсы ҡатнашыусыһы: "Мин Исҡужина Фәниә Мотығулла ҡыҙы бала сағым Күгәрсен районы Ураҡай, Игебай ауылында үтте. Ата-әсәйебеҙ дүрт балаға бәләкәй саҡтан хеҙмәткә һөйөү тәрбиәләп үҫтерҙеләр. Атайым Иҫәнбирҙин Мотығулла Хәмит улы Ураҡай мәктәбенең директоры булып эшләне. Беҙ бәләкәй саҡта уҡ, атайым питомниктан алма, сейә, крыжовник, һырғанаҡ алып ҡайтып ултыртып үҫтерҙек, йәшелсәләр ҙә күп уңыш бирә ине. Картуфты Ырымбур өлкәһенән килеп һатып ала торғандар ине. Беҙ күмәкләшеп сөгөлдөр ҙә, бесән дә саптыҡ һәм күбәләнек, урманға барып утын да эшләнек ул ваҡытта. Мәктәпте тамамлағас Өфө китапхана техникумында китапханасы һөнәрен үҙләштереп 41 йыл китапханасы, мөдир булып ең һыҙғанып эшләнем. Президентыбыҙ Мортаза Ғөбәйҙулла улы Рәхимов ҡулынан "Башҡортостан Республикаһында күрһәткән фиҙәҡәр хеҙмәттәре өсөн" билдәһе менән бүләкләндем. Төрлө конкурстарҙа ҡатнашып дипломдар, маҡтау ҡағыҙҙары алдым. "Мәләүез таңдары" әҙәби берекмәһе ижадсылары менән тығыҙ бәйләнештә эшләнек. Фәтҡулла Комиссаров исемендәге премия лауреатына лайыҡ булдым. Хәҙер хаҡлы ялдамын. Тормош иптәшем Таһир Хәмзә улы менән ике балаға Айгөл ҡыҙым менән улым Вадимға ғүмер биреп үҙҙәренең балалары - беҙҙең яратҡан ейәнсәрҙәребеҙ ҙурайып үҫеп киләләр! Беҙ дүрт ейәнсәребеҙгә олатай, өләсәйбеҙ!!! Шәхси йортта йәшәгәс, үҙебеҙҙең баҡсабыҙ булғас, һәр ваҡыт баҡса эштәре менән мәшғүл булабыҙ, тауыҡтар ҙа тотабыҙ. Алма, груша, слива, виноград, сейә, ҡарағат, ҡурай еләге, йәшелсәләр үҫтерәбеҙ. Минең өсөн баҡса эше февраль айынан башлана - борос, помидор үҫентеләрен өйҙә сәсәм, аҙаҡ теплицаға сығарып ултыртам. Теплицала ҡыяр, помидор артынан айырым иғтибар талап ителә. Көн йылытҡас йәшелсәләрҙе баҡсала ла ултыртабыҙ. Аҙаҡ компот, ҡайнатмалар, емештәрҙе туңдырып, йәшелсәләр тоҙлау, салаттар, лечо, күп итеп борщ эшләү мәшәҡәттәре башлана. Мин баҡса эштәрен йәш саҡтан уҡ яратып эшләйем. Сәскәләр ҙә баҡсаға йәм биреп ултыра". Фотолар Фәниә Исҡужина архивынан.