Көҙ миҙгеле башланды. Был ҡыҙыу мәлдә йәйге эштәргә йомғаҡтар яһайҙар, ҡышҡылыҡҡа әҙерлек барышын барлайҙар. Хөкүмәттең аҙналыҡ кәңәшмәһе лә ошо юҫыҡта эшләй. Бөгөн илдәге сәйәси ваҡиғаларға, ураҡ барышына тәүге йомғаҡтар яһалды, ҡышҡылыҡҡа әҙерлек тикшерелде. Башҡортостан Башлығы Радий Хәбиров ял көнөндә уҙған Берҙәм тауыш биреү көнөн Башҡортостан лайыҡлы үткәрҙе тине һәм һайлауға килгәндәргә рәхмәт әйтте, һайланған депутаттарға уңышлы эш теләне. 5-6 сентябрҙә Совет майҙанында үткән “Көҙ романтикаһы” классик музыка фестиваленә лә йомғаҡ яһалды. Ойоштороусылар билдәләүенсә, сара кешегә бик оҡшаны. Радий Фәрит улы киләһе йылда тамашасылар һәм ултырыу урындарын арттырырға, программаны киңәйтергә, ә фестивалде ике генә түгел, ә өс-дүрт көн дауамында үткәрергә тәҡдим итте. Кәңәшмәлә Радий Хәбиров Өфөлә донъя кимәлендәге Евразия ғилми-тикшеренеү үҙәген асыу тураһында һөйләне. “Ниһайәт, Евразия ғилми-белем биреү үҙәгенең үҙ майҙансығы барлыҡҡа килде, айырыуса уның йәш өлөшөндә. Яҡшы ремонт эшләнгән. Беҙҙең ғилми-тикшеренеү үҙәге яҡшы үҫешә, шуға күрә тағы бер ҡаттың ремонтына һәм бинаның тышын яңыртыуға аҡса табырға ҡуштым. Киләһе йылға быны эшләү зарур”, – тине Радий Хәбиров, Башҡортостан Башлығы хакимиәте етәксеһе Максим Забелинға һәм Башҡортостан Республикаһы вице-премьеры – финанс министры Лира Иғтисамоваға мөрәжәғәт итеп. Көҙ башланыу менән миҙгел сирҙәре лә арта. Әлегә Башҡортостанда киҙеү буйынса хәл тыныс, прививка яһау кампанияһы әүҙем бара, тип хәбәр итте Роспотребнадзорҙың төбәк идаралығы етәксеһе Анна Казак. Бөгөн, уның һүҙҙәренсә, республикала грипп менән сирләүҙең бер генә лаборатор-тикшереү осрағы асыҡланған. Башҡортостан Башлығы киҙеү буйынса хәлде контролдә тоторға ҡушты. “Мин Роспотребнадзорҙың республика идаралығына коронавирус инфекцияһы буйынса ла хәлде иғтибар менән күҙәтеп барыуҙарын һорайым. Хәл тотороҡло, әммә, ғәҙәттәгесә, тынысланмайбыҙ”, – тине Радий Хәбиров. Республиканың Һаулыҡ һаҡлау министрлығының 11 сентябргә мәғлүмәттәре буйынса, республикала 500 меңгә яҡын кеше киҙеүгә ҡаршы вакцинация үткән. Шулай уҡ кәңәшмәлә алданған өлөшсөләр проблемаһын хәл итеү, ауылдарҙа урынлашҡан почта бүлексәләрен норматив хәлгә килтереү тикшерелде. Фото: "Башинформ".