Радий Хәбиров: "Башҡортостанда "Берҙәм Рәсәй"ҙең уңышына ышанабыҙ"

10 сентябрҙә “Берҙәм Рәсәй” партияһы рәйесе, илдең Именлек советы рәйесе урынбаҫары Дмитрий Медведев видеоконференция тәртибендә төбәктәр менән Берҙәм тауыш биреү көнө йомғаҡтарына арналған кәңәшмә үткәрҙе. Унда Башҡортостан Башлығы Радий Хәбиров та ҡатнашты. Дмитрий Медведев билдәләүенсә, өс көн дауамында, 8 – 10 сентябрҙә, халыҡ губернаторҙарҙы, төбәк һәм урындағы кимәлдәге депутаттарҙы һайлаған. Ул шулай уҡ “Берҙәм Рәсәй” партияһының халыҡ программаһы нигеҙендә төбәккә төбәлгән һайлауҙар үткәргәнен иҫкә төшөрҙө. - Һайлауҙар үтте – “Берҙәм Рәсәй” лайыҡлы сығыш яһаны. Аңлы рәүештә участкаларға килгән граждандарға рәхмәт белдерәм. Хәҙер иң ҡатмарлы өлөш - вәғәҙәләрҙе үтәү - килә. Мандат алған, тейешле вазифа алған һәр кем үҙ вәғәҙәләренә тоғро ҡалыр һәм “Берҙәм Рәсәй” партияһының халыҡ программаһы менән етәкселек итер, тип ышанам, – тине Дмитрий Медведев. Партия рәйесе, тауыш биреү шулай уҡ Рәсәйҙең яңы төбәктәрендә үтте, ә депутат мандаттарына махсус хәрби операцияла ҡатнашыусы 100-ҙән ашыу кеше һайланды, тип өҫтәне. Башҡортостан Башлығы Радий Хәбиров республика Дәүләт Йыйылышы – Ҡоролтайға һәм ауыл советтарына һайлауҙың төп йомғаҡтары тураһында һөйләне. - Һайлау кампанияһы көнәркәшле барҙы. Дәүләт Йыйылышы - Ҡоролтайға бер мандатҡа һигеҙ кандидат тура килә. Тауыш биреүҙә һайлаусыларҙың 50 проценттан ашыуы ҡатнашты. Беҙҙә әле тауыштарҙы иҫәпләү бара. Әммә экзит-пулдар мәғлүмәттәре буйынса һәм, иң мөһиме, был электораль осорҙа партия кешеләр менән йәнәш булғанлыҡтан, беҙ Башҡортостанда “Берҙәм Рәсәй”ҙең уңышына тулыһынса ышанабыҙ, – тип хәбәр итте Радий Хәбиров. Төбәк етәксеһе шулай уҡ парламенттың яңы составына махсус хәрби операция ветераны, прапорщик Артур Ғәлиевтең инәсәген хәбәр итте. – Уға ни бары 21 йәш, ул ҡаты яраланған. Хәҙер ул исемлектә. Беҙҙең менән бергә Артур ошо электораль осорҙо үтте һәм парламентта эшләйәсәк –яугирҙәргә ярҙам итеү менән шөғөлләнәсәк. Әлбиттә, хәҙер иң мөһиме - халҡыбыҙҙың ышанысын аҡлау, һәм беҙ быны мотлаҡ эшләйәсәкбеҙ. “Берҙәм Рәсәй” партияһы етәкселегенә рәхмәт белдерәм. Һеҙҙең ярҙамығыҙ менән беҙ үҙебеҙҙе ҙур ғаиләнең, ҡеүәтле сәйәси көстөң бер өлөшө итеп тоябыҙ, ул беҙгә һәр ваҡыт алға хәрәкәт итеү өсөн көс бирә, – тине Радий Хәбиров. Дмитрий Медведев үҙ сиратында Башҡортостандың идара итеү командаһын һайлауҙар менән ҡотланы һәм артабанғы эшендә уңыштар теләне. – Махсус хәрби операцияла ҡатнашҡан яугирҙәрҙең парламент составына инеүе бик күп мәсьәләләрҙе хәл итергә, шул иҫәптән үҙҙәре алған тәжрибәне файҙаланырға мөмкинлек бирәсәк. Һеҙ әйткән ҙур маҡсаттарыбыҙҙы тормошҡа ашырасағыбыҙға ышанам. Һеҙ уларға өлгәшә алаһығыҙ, ә иң мөһиме – белемегеҙҙе, тәжрибәгеҙҙе ҡулланып, беҙҙең программа документтарында теркәлгән бөтә нәмәне эшләргә мөмкин. Башҡортостанда барыһы ла килеп сығыр, тип ышанам, – тип билдәләне Дмитрий Медведев. Фото: glavarb.ru