Азат ЙӘНГИРОВ: Парламент 50 процентҡа яңырыр тип көтәбеҙ

“Һайлау-2023” Йәмәғәт матбуғат үҙәгендә сәйәси эксперттар менән брифингтар дауам итә. Иҡтисад фәндәре докторы, доцент Азат Йәнгиров башҡорт телендә быйылғы тауыш биреүҙең үҙенсәлектәре тураһында һөйләне. – Быйылғы һайлауҙы алдағы йылдарҙа буласаҡ Рәсәй Президенты һәм Башҡортостан Башлығы һайлауҙарына репетиция тип атарға була. Беҙҙең әлегә тиклем эшләгән Дәүләт Йыйылышы – Ҡоролтай депутаттары бик матур эшләне. Был йылдарҙа ҡатмарлыҡтар байтаҡ булды – коронавирус пандемияһы, махсус хәрби операция башланды. Был нимәгә килтерҙеме? Беҙҙең партияларҙың ҡараштары ҡайһы бер мәсьәләләрҙә айырылһа ла, улар берләште, матур итеп бергә эшләй башланы, – тине ул. Азат Вәзир улы фекеренсә, республика парламенты яҡынса 50 процентҡа яңырасаҡ һәм ныҡ ҡына йәшәрәсәк, сөнки йәш кандидаттар күп. – Быйыл иң йәш кандидатҡа 23 йәш, шулай уҡ утыҙға тиклем дәғүәселәр байтаҡ. Йәштәр артһа, тимәк яңы ҡараш, яңы һулыш буласаҡ. Шул уҡ ваҡытта, тәжрибәле депутаттарҙың да парламентта булыуы мөһим. Беҙҙә традицион эш ойошторолған һәм шул нигеҙҙәрҙән тайпылырға кәрәкмәй. Алтынсы саҡырылыш депутатары араһында 90 процент ир-ат ине. Беҙ депутаттар араһында ҡатын-ҡыҙҙарҙың артыуын теләр инек. Уларҙың сәйәси ваҡиғаларға ҡарашы башҡараҡ һәм ул эштә кәрәк, – тине ул. Быйыл парламентта партиялар һаны нисек булыр тигән һорауға ул былай тип яуап бирҙе: – Партиялар һаны артһа ла, улар республикала барыһы ла бер тигеҙ эшләй тип әйтеп булмай. Парламентҡа килгән яңы партиялар Башҡортостан халҡы менән яҡынлашты тип әйтә алмайым. Ә электән булғандары үҙ эшен дауам итте, халыҡ менән даими осрашып, уларҙың проблемаларын өйрәнде, уларҙы хәл итергә тырышты. Тәү сиратта, социаль өлкәгә иғтибар кәрәк. Кешеләрҙең тормош кимәле артырға тейеш, һәр кем ошоноң өсөн тырышһын ине. Мин партияларҙың асыҡ булыуын теләйем. Халыҡ депутаттарҙың ниндәй закон ҡабул итергә теләгәнен белһен ине, уны алдан уҡ йәмәғәтселеккә сығарыр кәрәктер тип уйлайым, – тине ул. Алып барыусы ғалимдан ауыл һәм ҡалала һайлау барышы тураһында ҡыҙыҡһынды. – Элек-электән ауыл халҡы һайлауға байрамға барған кеүек йөрөй. Был тенденция әле лә һаҡлана һәм шулай булып ҡалһын да ине тип теләйбеҙ. Улар иртән-иртүк килә, үҙ бурыстарын атҡара, аралаша, йырлап-бейешеп ала. Ә ҡала кешеләрендә бер ни тиклем һүлпәнлек булды һәм бар. Шуға иғтибар иттем: кандидаттар араһында йәштәр күп ти инек, быйыл һайлаусылар араһында ла йәштәр артты. Уларҙың был сәйәси ваҡиғаға ҡыҙыҡһыныуы һиҙелеп артты, улар социаль тормошҡа әүҙемерәк йәлеп ителә һәм был да һәйбәт күренеш. Үҙем таң менән барҙым һәм тауышымды бирҙем. Алдағы йылдар менән сағыштырғанда һайлауҙы ойоштороуҙа үҙгәрештәр бик тойолманы, – тине эксперт. Бөгөн республика халҡы ауыл советтарына депутаттар һайлай. Ауыл өсөн был һайлауҙар шулай уҡ бик мөһим сәйәси әһәмиәткә эйә. – Ауылда депутат һәр кемдең яҡын кешеһе булырға, халыҡтың мәнфәғәттәрен яҡларға тейеш. Был һайлау күпкә яуаплыраҡ та, сөнки кешеләр уларҙы көн һайын күрә, мөрәжәғәт итә. Тағы шуға иғтибар иткем килә, ауыл депутаттары Дәүләт Йыйылышы – Ҡоролтай депутаттары менән тығыҙ бәйләнеш булдырырға, әүҙем эшләргә тейеш. Был халыҡ өсөн файҙалы булыр ине. Дөйөмләштереп шуны әйтәм: Башҡортостан депутаты үҙ иленең ысын патриоты булһын, тыуған ерен һәм халҡын яратһын, – тине ул. Айрат Нурмөхәмәтов фотоһы.