Әлеге ваҡытта тауыш биреү тыныс, эш тәртибендә бара

10 сентябрҙә Башҡортостанда Берҙәм тауыш биреү көнө — йылдың төп сәйәси ваҡиғаларының береһе башланды. Республика халҡы БР VII саҡырылыш Дәүләт Йыйылышы - Ҡоролтайға 110 депутат һайларға тейеш, уларҙың вәкәләттәре биш йыл дауам итәсәк. Республикала 2023 йылғы һайлауҙар ысын мәғәнәһендә күләмле буласаҡ - Башҡортостан Үҙәк һайлау комиссияһы рәйесе Илона Макаренко һөйләүенсә, территориаль һайлау комиссиялары һәм участкалары һаны буйынса Башҡортостан Мәскәү өлкәһенән генә ҡалыша. Бөгөн “Һайлау-2023” Йәмәғәт матбуғат үҙәгендә Илона Макаренко журналистар алдында сығыш яһаны. Башҡортостандың үҙәк һайлау комиссияһы рәйесе белдереүенсә, БР Үҙәк һайлау комиссияһынан тыш 69 территориаль һайлау комиссияһы һәм 3273 һайлау участкаһы йәлеп ителгән, уларҙың бер өлөшө һайлаусыларыбыҙҙың ваҡытлыса йәшәү урынында булдырылған. – Бөгөн сәғәт 7-лә республикала 3273 һайлау участкаһы асылды. Уларҙа 28 меңдән ашыу кеше эшләй. Әлеге ваҡытта тауыш биреү тыныс, эш режимында бара. Бөтә көн барышында шулай үтһен тип теләйбеҙ. Әле беҙҙең төп бурыс – бөтә һайлаусыларҙы һайлау участкаларында көтөп алыу. Быйыл беҙҙә дистанцион рәүештә тауыш биреү ҡаралмаған. Беҙ әле башҡа төбәктәрҙең был өҫтәмә тауыш биреү формаһын өйрәнәбеҙ. Элекке традицион тауыш биреү формаһы һаҡланып ҡаласаҡ. Әлеге мәлдә дистанцион тауыш биреү Мәскәүҙә һәм тағы ла 24 төбәктә ҡулланыла. Киләһе йыл был тәжрибә беҙҙең республикаға ла килер тип уйлайбыҙ. Элекке тәжрибәнән сығып ҡарағанда, беҙҙе иң әүҙем һайлаусылар - өлкән йәштәге кешеләр. Улар айырыуса гражданлыҡ яуаплылығын күрһәтә. Шуға ла таңғы сәғәт 7-нән ошо категорияға ҡараған кешеләр тауыш биргәндер, тип уйлайым. Һауа торошоноң үҙгәреүе, ямғыр һәм һалҡын булыуы ла һайлауҙа ҡатнашыусылар әүҙемлегенә йоғонто яһамаҫ тип ышанабыҙ. Шуға ла беҙҙең граждандар тәүҙә беҙҙең һайлау участкаларына барыр, аҙаҡ үҙҙәренең эштәре менән булышыр, тип уйлайбыҙ, - тине Илона Макаренко. Республиканың Үҙәк һайлау комиссияһы рәйесе белдереүенсә, быйыл 18 йәше тулған 71031 кеше тәүге тапҡыр тауыш биреүҙә ҡатнашыу хоҡуғына эйә. Улар һайлау участкаларына килер, үҙҙәренең хоҡуғы менән файҙаланыр, тип уртаҡлашты ул. Шулай уҡ 25 меңгә яҡын “Мобиль һайлаусы” ҡушымтаһын файҙаланған, улар Берҙәм тауыш биреү көнөндә барған урындарында тауыш бирә ала. Иҫегеҙгә төшөрәбеҙ, 10 сентябрҙә Башҡортостанда етенсе саҡырылыш республика Дәүләт Йыйылышы - Ҡоролтайға һәм урындағы үҙидараның вәкиллекле органдарына депутаттар һайлау үтә. Автор фотоһы.