114-се һайлау участкаһы Өфө дәүләт технологиялар һәм дизайн колледжында (адресы – Чернышевский урамы, 141) урынлашҡан. 114-се һайлау участкаһы рәйесе Наталья Шепелеваның һүҙҙәренә ҡарағанда, уларҙа һайлаусыларҙың һаны - бер мең 546. Баш ҡалабыҙҙың Ветошников, Чернышевский, Минһажев һәм башҡа урамдарҙа йәшәгәндәр һәр саҡ һайлауға иртә йөрөй, ғөмүмән, гражданлыҡ бурысына бик тә яуаплы ҡарай. Әйткәндәй, ете тулып ун минут үтеүгә ике кеше һайлауҙа ҡатнашырға өлгөргән дә инде. Мәҫәлән, Роберт тип үҙен таныштырған ағай, ошоға тиклем күпме һайлау кампанияһы ойошторолған, уларҙың береһен дә ҡалдырмаған. – Быйыл ейәнем менән ейәнсәрем паспорт алды, тимәк, улар әлеге һайлауҙа беренсе тапҡыр ҡатнаша, тағы бер нәмә – ғаиләбеҙҙә лә, туғандар араһында ла һайлауға барыу-бармау тураһында һүҙ булғаны юҡ, бөтәбеҙ ҙә унда ҡатнашабыҙ, – тип һөйләй әңгәмәсем. Фото: Илдар Аҡъюлов.