Бөгөн Хөкүмәттең аҙналыҡ кәңәшмәһе күңелле ваҡиғалар менән башланды. Башҡортостан Башлығы Радий Хәбиров лайыҡлыларҙы бүләкләү тантанаһында ҡатнашты. Тәүге герой – Балтас районынан махсус хәрби операцияла ҡатнашҡан яугир, 21 йәшлек Илдарис Х. Ҡыҫҡа ваҡытлы ялға ҡайтҡан егет күршеләрендә янғын сығыуын ишетеп ҡала һәм ярҙамға ташлана. Ул ут ялмап алған өйҙөң тәҙрәһен ватып, инвалид ирҙе һөйрәп сығара һәм шуның менән уның ғүмерен ҡотҡара. – Илдарис Рәдис улына ҡаһармалығы һәм хеҙмәте өсөн рәхмәтлебеҙ. Уға дәүләт наградаһын тапшырғым килә, – тине Радий Хәбиров. Ҡыйыу егет Шайморатов ордены менән наградланды. Сираттағы бүләкләнеүселәр – Цюрихта химия буйынса халыҡ-ара олимпиада еңеүсеһе, Республика инженер лицей-интернаты уҡыусыһы Вадим Харисовты һәм уның педагог-остазы, химия уҡытыусыһы Айнур Ғүмәров. Йәш уҡытыусы Айнур Ғүмәров республика етәксеһе ҡулынан Башҡортостан Республикаһының Почет грамотаһын алды, уның уҡыусыһы – буласаҡ 11 класс уҡыусыһы Вадим Харисов Башҡортостан Башлығының Рәхмәт хаты менән бүләкләнде. Етәксе уларға емешле эштәре өсөн рәхмәт әйтте һәм Башҡоростандың ғорурлығы тип атаны. Үҙ сиратында Айнур Ғүмәров республика педагогтары исеменән республика етәкселегенең Уҡытыусы һәм остаз йылында ярҙамын һәм иғтибарын күреүе бик ҡыуаныслы булыуын билдәләне. Ул шулай уҡ республика Башлығына уҡытыусы, Рәсәйҙең халыҡ уҡытыусыһы Лиза Әғәҙуллинаның Өфөлә Беренсе уҡытыусыға һәйкәл ҡуйыу тураһындағы хыялын үтәүен һорап мөрәжәғәт итте. Башҡортостан Башлығы был мәсьәлә менән шөғөлләнергә вәғәҙәләне. Фото: Башинформ.