Һөнәри белем биреү өлкәһендә дүрт килешеүгә ҡул ҡуйылған

Санкт-Петербургта Башҡортостан көндәре сиктәрендә һөнәри белем биреү өлкәһендә дүрт килешеүгә ҡул ҡуйылған. 26 августа Башҡортостандың профессиональ белем биреү ойошмалары Санкт-Петербург колледждарында булды.Төп маҡсат – тәжрибә уртаҡлашыу, артабанғы хеҙмәттәшлек мәсьәләләрен тикшереү. Тәүҙә “Санкт -Петербург идара һәм коммерция техник колледжы”нда булдылар. Унда уҡыусыларҙың һөнәри йүнәлешенә мөхит булдырыу, уларҙы колледжда шул юҫыҡта артабан уҡытыу тәжрибәһе күрһәтелде. “Урта һөнәри белем биреү мәсьәләләре буйынса төбәк-ара хеҙмәттәшлек” дискуссия майҙансығы ойошторолдо, унда урта һөнәри белемде үҫтереү перспективаһы, уҡыу-производство комплексын булдырыу, “Профессионалитет” федераль проекты буйынса төбәк-ара хеҙмәттәшлекте ойоштороу, оборона-сәнәғәт комплексы предприятиелары, пилотһыҙ авиация системалары өсөн кадрҙар әҙерләү, уҡып сыҡҡандарҙы эшкә урынлаштырыу мәсьәләләре ҡаралды. Осрашыуҙарҙа Башҡортостан Республикаһы Профессиональ белем биреү ойошмалары директорҙар советы һәм Рәсәй Урта махсус уҡыу йорттары директорҙар советы менән Килешеүҙәр төҙөлдө. “Профессионалитет” федераль проекты ҡатнашыусылары Килешеүе: Өфө машиналар эшләү колледжы, Стәрлетамаҡ политехник колледжы, Санкт-Петербург “Электромашиналар төҙөү колледжы”, “Ж.Я. Котин исемендәге машина төҙөү академияһы” араһында. Өфө радиоэлектроника, телекоммуникациялар һәм хәүефһеҙлек колледжы һәм Санкт-Петербург “Электроника һәм приборостроение колледжы” араһында Килешеү. Килешеүҙәр преподавателдәр һәм студенттар өсөн стажировкалар, ижади һәм башҡа проекттарҙы бергәләп тормошҡа ашырыу, эш биреүсенең һорауына заманса программалар төҙөу өлкәһенә ҡағыла. Делегация шулай уҡ “Һанлы технологиялар академияһы”, “Таланттар академияһы” һәм Санкт-Петербург “Электроника һәм приборҙар төҙөү колледжы”н барып күрҙе. Фото: БР Мәғариф һәм фән минстрлығы матбуғат хеҙмәте.