Санкт-Петербургта барған Башҡортостан көндәрендә республиканың ҡул оҫталары үҙ эштәрен тәҡдим итте. Һарай майҙанына яҡын Ҙур Диңгеҙ урамында урынлашҡан халыҡ художество кәсептәре күргәҙмәһе күптәрҙе үҙенә йәлеп иткәндер. Бында тире һәм кейеҙҙән эшләнгән әйберҙәр, һуғылған балаҫтар, сувенирҙар һәм башҡа күп әйберҙәр менән танышырға мөмкин. Был тирәлә бик йәнле: урындағы халыҡ та, ҡунаҡтар ҙа Башҡортостандың сәнғәте менән теләп таныша, оҫталыҡ дәрестәрендә әүҙем ҡатнаша. “Бикбайман” арт-студияһын тәҡдим иткән Артур Бикбай Петербургка эксклюзив сувенирҙар алып килгән. Уның брелок, браслет йә магнитиктары - һәр береһе Башҡортостандың тарихы, традициялары, күркәм урындары, бөйөк кешеләре тураһында һөйләй. Мәҫәлән, Торатау, Шүлгән-таш, Арыҫлан Мөбәрәков, башҡорт легендаһынан бүре һәм башҡалар... Өфөнән Юлиә тәбиғи тиренән сумкаларын күргәҙмәгә ҡуйған. Оҫтабикә уларҙы үҙ ҡулдары менән теккән, дизайнын башҡорт орнаменттары нигеҙендә төҙөгән. Күргәҙмәлә Иглин художество мәктәбе директоры художник Михаил Бадьин кейеҙ әйберҙәрен күрһәтә. Ул уны эшләү серҙәре менән таныштыра. Хатта заказ биреүселәр ҙә бар. Фото: Евгений Соколов.