Башҡортостандың иҡтисади ҡеүәте күрһәтелде

26 августа Санкт-Петербургта төбәктең инвестиция һәм иҡтисади ҡеүәте менән таныштырыу сараһы уҙҙы. Унда дәүләт власы органдары, иҡтисадты һәм эшҡыуарлыҡты үҫтереү институттары етәкселәре, бизнесмендар һәм ҙур компания вәкилдәре ҡатнашты. Сара Санкт-Петербургта Башҡортостан көндәренең эшлекле программаһы сиктәрендә Эрмитаждың Төп штабында уҙҙы. Презентацияла ҡатнашыусыларҙы Башҡортостан Башлығы Радий Хәбиров, Санкт-Петербург губернаторы Александр Беглов һәм Дәүләт Эрмитажы директоры Михаил Пиотровский сәләмләне. – Башҡортостандан беҙгә бик ҙур делегация, 500-гә яҡын кеше килде. Был бер-беребеҙҙең ҡыҙыҡһыныуы, хеҙмәттәшлегебеҙҙе киңәйтеүҙең ҙур потенциалы тураһында һөйләй, – тип билдәләне Александр Беглов. – Рәсәй Президенты Владимир Владимирович Путин беҙҙең алға илдең технологик суверенитетын нығытыу бурысын ҡуйҙы. Санкт-Петербург һәм Башҡортостан – ошо бурысты үтәү өсөн айырыуса яуаплы булған Рәсәйҙең ҙур сәнәғәт үҙәктәре. Санкцион баҫымға ҡарамаҫтан, төбәктәребеҙ араһында хеҙмәттәшлекте киңәйтәсәкбеҙ. Ул яҡшы һөҙөмтә бирә. Башҡортостан Башлығы үҙ сығышында иҡтисад һәм социаль өлкәнең төрлө тармаҡтарында Санкт-Петербург менән берлектәге проекттарҙы тормошҡа ашырыуҙа ҙур ҡыҙыҡһыныу белдереүен билдәләне. – Төбәк-ара хеҙмәттәшлегебеҙ, ысынлап та, ҙур потенциалға эйә. Хәҙерге шарттарҙа тыуған илдә яңы ышаныслы партнерҙар табабыҙ. Санкт-Петербургтың иҡтисады менән беҙҙе тәрән мөнәсәбәттәр бәйләй. Санкт-Петербургтың индустриаль һәм фәнни-технологик ҡеүәте уларға яңы импульс бирә, республикабыҙ сәнәғәтен үҫтереүгә булышлыҡ итә алыуын яҡшы беләбеҙ. Ә Башҡортостан Санкт-Петербургтың иҡтисадын тулыландыра һәм көсәйтә ала, – тип билдәләне Радий Хәбиров. – Беҙҙең делегация составында ҙур бизнес-миссия инде. Әлбиттә, Санкт-Петербургка беҙ федераль ғилми үҙәккә ҡараған кеүек ҡарайбыҙ. Бында юғары ғилми потенциал тупланған. Шуға күрә мәҙәни һәм фәнни хеҙмәттәшлек өлкәһендә артабан хеҙмәттәшлек итеү төп бурыстарҙың береһе булып тора. Башҡортостан Хөкүмәте Премьер-министры Андрей Назаров төбәктең ентекле презентацияһы менән сығыш яһаны. Уның һүҙҙәренсә, республика ышаныслы иҡтисади партнер тигән репутацияға эйә. Эшлекле мөхит сифаты һәм эшҡыуарлыҡ эшмәкәрлегенең уңайлылыҡ кимәле буйынса Башҡортостан Рәсәйҙең алдынғы төбәктәре иҫәбенә инә. Андрей Назаров төбәк иҡтисадының диверсификациялау кимәле юғары булған күп тармаҡлы структураға эйә булыуы хаҡында һөйләне. Башҡортостанда йылдам социаль-иҡтисади үҫеш биләмәһе, “Алға” махсус иҡтисади зонаһы, шулай уҡ инвестиция проекттарына ярҙам сараларының киң исемлеге эшләй. Төбәк-ара бәйләнештәрҙе артабан нығытыу өсөн Андрей Назаров Башҡортостанда Санкт-Петербург көндәрен уҙғарырға тәҡдим итте. – Был ҡала халҡын һәм бизнес вәкилдәрен Рәсәйҙең төньяҡ баш ҡалаһының иҡтисади потенциалы һәм мәҙәни рухы менән таныштырырға мөмкинлек бирәсәк, – тине Премьер-министр. – Бынан тыш, 2024 йылда беҙҙең өсөн мөһим ваҡиға була. Был – баш ҡалабыҙҙың 450 йыллығын байрам итеү. Санкт-Петербург һәм Ленинград өлкәһе делегацияһын Башҡортостанда юбилей тантаналарында шатланып көтәбеҙ. Фото: Башҡортостан Башлығы сайты.