Эшлекле форум яңы мөмкинлектәр асты

26 августа Санкт-Петербургта Башҡортостан Башлығы Радий Хәбиров республика делегацияһының Рәсәйҙең төньяҡ баш ҡалаһына рәсми сәфәре барышында уҙған эшлекле форумда ҡатнашты. Эрмитаждың Төп штабы майҙансығында Башҡортостандың иҡтисади һәм инвестиция мөмкинлектәренең презентацияһы, шулай уҡ пленар ултырыш үтте. Уның темаһы – “Төбәк-ара партнерлыҡ – биләмәләрҙе үҫтереү нигеҙе”. Мәҙәни баш ҡала менән хеҙмәттәшлектең төп йүнәлештәренең береһе – Санкт-Петербург музейҙары менән үҙ-ара эш итеү. Дәүләт Эрмитажы директоры Михаил Пиотровский үҙ сығышында хеҙмәттәшлектең яңы формалары тураһында һөйләне. – Беҙ бер мәҙәни киңлектә йәшәйбеҙ һәм учреждениеларҙың күп һанлы уртаҡ эш форматтарын булдырҙыҡ. Әммә хәҙерге шарттарҙа йәмғиәттең яңы талаптарына яуап биргән башланғыстарҙы тәҡдим итеү мөһим, – тине Михаил Пиотровский. – Мәҫәлән, Эрмитажда Башҡортостан музейҙары көндәре ҡыҙыҡлы ваҡиғалар булыуы ихтимал. Санкт-Петербург губернаторы ҡаланың Рәсәй төбәктәре менән үҙ-ара килешеп эш итеүен билдәләне. – Беҙ партнерлыҡ сәйәсәтен һайланыҡ. Беҙ конкуренция алып бармайбыҙ, ә бер-беребеҙҙе тулыландырабыҙ, – тип белдерҙе Александр Беглов. Ул шулай уҡ туризм тармағында Башҡортостан менән Санкт-Петербургтың берлектәге проекттары потенциалын юғары баһаланы. Радий Хәбиров Башҡортостан делегацияһы составына туроператорҙар инеүен һыҙыҡ өҫтөнә алды. Улар яңы бәйләнештәр булдырыу өсөн Петербургтағы хеҙмәттәштәре менән осрашты. – Рәсәйҙең һәр кешеһе өсөн Санкт-Петербург – ул Ватан тарихының мөһим өлөшө. Был уникаль ҡала, мәҙәни баш ҡала, сәнәғәт һәм фәнни-технологик үҙәк. Минең өсөн был донъяның иң матур ҡалаларының береһе. Ул беҙҙә ата-бабаларыбыҙ бүләк иткәнгә һаҡсыл ҡарашты һәм яңы ижади ҡарарҙарҙы берләштерә, – тине төбәк етәксеһе. – Беҙ Башҡортостандан мөмкин тиклем күберәк кешенең Санкт-Петербургтың матурлығына һоҡлана алыу мөмкинлеген эҙләйбеҙ. Фекер алышыу сиктәрендә пленар ултырышта ҡатнашыусылар көнүҙәк һорауҙарға яуап бирҙе. Уларҙың береһе – Башҡортостан менән Петербургтың социаль туризм өлкәһендәге проекттарын берләштереү мөмкинлеге тураһында. Мәҫәлән, республика Беларусь һәм Абхазия менән хеҙмәттәшлектә “Башҡортостанда оҙон ғүмер” программаһының бер нисә яңы йүнәлешен башлап ебәрҙе лә инде. – Беҙ был проектта өлкән быуынға һөйөү һәм ихтирам күрһәттек, – тине Радий Хәбиров. – Уларҙың күптәре ғүмере буйына Башҡортостандың, Рәсәйҙең башҡа төбәктәренең һәм сит илдәрҙең үҙенсәлекле матурлығы менән таныша алмаған. Һәм, әлбиттә, ветерандарыбыҙға төньяҡ баш ҡалабыҙҙы күрһәтергә теләйбеҙ. Александр Беглов Санкт-Петербург пенсионерҙарының Башҡортостанға сәфәре һәм ошо программа сиктәрендә Төньяҡ баш ҡалала республика ҡунаҡтарын ҡабул итеү мөмкинлеген өйрәнергә ҡушты. Республика Башлығы шулай уҡ Петербургтың йәмәғәт киңлектәрен һәм парк биләмәләрен төҙөкләндереү тәжрибәһен таратыу менән ҡыҙыҡһыныуын белдерҙе. – Ҡалағыҙҙа ҡыҙыҡлы ҡарарҙар бик күп. Был “Яңы Голландия” утрау-паркы проекты, “Флагшток» исемле Фин ҡултығы яры буйындағы территория, Исакий майҙанындағы баҡса-трансформер. Уларҙы әҙерләгәндә барыһы ла ваҡ-төйәккә тиклем уйланылған, – тип билдәләне Радий Хәбиров. – Беҙ ошо йәһәттән тәжрибә уртаҡлашырға теләйбеҙ. Республикаға ла күрһәтерлек нәмәләр бар. Башҡортостан Башлығы һәм Санкт-Петербург губернаторы бизнесҡа ярҙам итеү тураһында ла һөйләне. Шулай итеп, Радий Хәбиров эшҡыуарҙарҙы яңы проекттар, шул иҫәптән офсет килешеүҙәре нигеҙендә тормошҡа ашырыу өсөн республикаға саҡырҙы. – Беҙгә эшлекле репутациябыҙ мөһим. Шуға күрә бизнес менән эшләүҙә беҙҙең өсөн иң мөһиме – ул ышаныслылыҡ. Был инвесторҙар йәлеп итеүҙә беҙҙең кредо, – тине төбәк етәксеһе. Пленар ултырыш аҙағында Радий Хәбиров менән Михаил Пиотровский Башҡортостан Хөкүмәтенең һәм Дәүләт Эрмитажының мәҙәни хеҙмәттәшлеге тураһында килешеүгә ҡул ҡуйҙы. Фото: Башҡортостан Башлығы сайты.