26 августа Санкт-Петербургта Башҡортостан Башлығы Радий Хәбиров республиканың рәсми делегацияһының төньяҡ баш ҡалаға сәфәре барышында Петропавловск ҡәлғәһенең тарихи-мәҙәни объекттарында булды. Ҡуяндар утрауында урынлашҡан оборона ҡоролмаһы 1703 йылдың 27 майында (яңы стиль буйынса) төҙөлә башлай. Был көн ҡаланың нигеҙе булып һанала. Санкт-Петербургтың Тышҡы бәйләнештәр буйынса комитеты рәйесе Евгений Григорьев менән бергә төбәк етәксеһе ҡоролманың мөһим объекттары менән танышты. Санкт-Петербургтың тарихы менән бәйле Петропавловск ҡәлғәһенең төп йолалары – Андреев флагын күтәреү һәм Нарышкин бастионы орудиеларынан залп биреү. Радий Хәбиров флаг күтәреү тантанаһында ҡатнашты һәм орудиеларҙан төшкө залпты бирҙе. –Ярты көн залпы, бик боронғо йола – ул Ватан тарихына ылыҡтырыу. Ә беҙ был символик залп менән Санкт-Петербургта Башҡортостан көндәрен асабыҙ, – тине Радий Хәбиров. – Төньяҡ баш ҡала халҡына һәм ҡунаҡтарына республикабыҙҙы киң күрһәтеү мөмкинлеге өсөн ҡала етәкселегенә ҙур рәхмәт. Төбәк етәксеһе шулай уҡ Санкт-Петербургка эш йәки ял итеү буйынса килгән яҡташтарыбыҙ менән аралашты. Билдәләп үтергә кәрәк, был көндәрҙә Петропавловск ҡәлғәһе территорияһында Арктика салоны үтә, уны Арктика эштәре буйынса ҡала комитеты ойоштора. Сара төньяҡ баш ҡаланың фәнни-мәғариф һәм мәҙәни потенциалын күрһәтә, шулай уҡ ҡунаҡтарҙы арктик төбәктәрҙең тәбиғәте, Төньяҡтағы төп халыҡтарҙың тарихы һәм мәҙәниәте менән таныштыра. Бынан тыш, 24 августан 30 сентябргә тиклем Санкт-Петербургтың Арктика һәм Антарктика дәүләт музейында Валериан Альбанов исемендәге “Башҡортостан моряктары – Ватанға хеҙмәт иткәндә!” ҡотопсолар музейының күсмә күргәҙмәһе эшләй. Фото: Башҡортостан Башлығы сайты.