"Алға" тик алға бара!

25 августа Салауат ҡалаһында Башҡортостан Башлығы Радий Хәбиров “Алға” махсус иҡтисади зонаһының Күҙәтеү советы ултырышын үткәрҙе. Ул ошо көндәрҙә үҙенең 75 йыллығын билдәләгән “Газпром нефтехим Салауат” предприятиеһы базаһында үтте. Көн тәртибендә – инвестиция проекттары сиктәрендә мөһим мәсьәләләр, уларҙы махсус иҡтисади биләмә резиденттары тормошҡа ашыра. Хәтерегеҙгә төшөрәбеҙ, ултырыш башланыр алдынан төбәк етәксеһе нефть һәм газ химияһы өлкәһендәге инновацион сәнәғәт предприятиеларының төҙөлөш майҙандарында булды. Фекер алышыу барышында ҡатнашыусылар яңы производстволарҙы сеймал менән тәьмин итеү буйынса пландарҙы, кооперация бәйләнештәрен үҫтереү һәм яңы проекттарҙы тормошҡа ашырыу перспективаларын ҡараны. – Бөгөн беҙ “Алға” махсус иҡтисади зонаһы Күҙәтеү советының дүртенсе ултырышын үткәрәбеҙ. Ул яҡшы темптар менән үҫешә һәм Рәсәйҙә иң йылдам үҫешеүсе махсус иҡтисади зона тип танылды, – тине Радий Хәбиров. Махсус иҡтисади зона биләмәһендә “Аркада” тегеү фабрикаһы, “ЗУР” яҡтылыҡ-диодлы лампалар сығарыу заводы, ZASPORT спорт кейеме фабрикаһы эшләй башланы ла инде, тип билдәләне төбәк етәксеһе. Ә дөйөм алғанда Ишембай һәм Стәрлетамаҡ райондарында майҙандар тулы тиерлек. – Быйыл беҙ “Алға” махсус иҡтисади зонаһы биләмәһен киңәйтеүгә өлгәштек. Яңы майҙансыҡ Өфө районында урынлашҡан һәм әле үк тулылана. Уның 300 гектарға яҡын майҙаны дөйөм алғанда 13 миллиард һумлыҡ яңы проекттар йәлеп итергә һәм 800-гә яҡын эш урыны булдырырға мөмкинлек бирер тип көтәбеҙ, – тип өҫтәне Радий Хәбиров. Республика башлығы 2023 йылдың 1 июленән Башҡортостанда Инвестицияларҙы яҡлау һәм дәртләндереү программаһы эшләй башлауын хәтергә төшөрҙө һәм яңы проекттарҙы тормошҡа ашырыу өсөн инженер инфраструктураһын артабан үҫтереү кәрәклегенә иғтибар йүнәлтте. Ултырышта Башҡортостан Хөкүмәте Премьер-министры урынбаҫары, “Алға” махсус иҡтисади зонаһының эксперт советы рәйесе Илшат Тажетдинов инвесторҙарҙа махсус иҡтисади зонаға ҡыҙыҡһыныуҙың артыуын билдәләне. Быйыл резидент статусын 20 миллиард һумлыҡ инвестиция проекттары менән тағы һигеҙ компания алды. Шулай итеп, резиденттарҙың дөйөм һаны 20-гә етте. Улар 65 миллиард һумға проекттар тормошҡа ашырырға һәм 2,7 меңдән ашыу яңы эш урыны булдырырға ниәтләй. – “Алға” махсус иҡтисади зонаһы Өфө районында яңы майҙансыҡ алды. Хәҙер уның дөйөм майҙаны 763 гектар тәшкил итә. “АМКОДОР” белорус компанияһы иген эшкәртеү өсөн комплекстар етештереү буйынса завод төҙөү проекты менән яңы территорияның тәүге резиденты булды. Ҡорамалдар монтажлау һәм сафҡа индереү-көйләү эштәре алып барыла. Производствоны асыу тантанаһы 2023 йылдың сентябренә планлаштырылғайны, – тине Илшат Тажетдинов. – Потенциаль резиденттар иҫәбендә – тағы ла бер нисә компания, уларҙың инвестициялары күләме 3 миллиард һум самаһы. Махсус иҡтисади зона инфраструктураһын үҫтереүгә төбәк бюджетынан 2,8 миллиард һум аҡса бүленгән. Башҡортостандың Үҫеш корпорацияһы – “Алға” махсус иҡтисади зонаһы идара компанияһы генераль директоры Наил Ғәббәсов хәбәр итеүенсә, махсус иҡтисади зона майҙансыҡтарына газ селтәре үткәрелгән. Төҙөүселәр һыу һәм энергия менән тәьмин итеү селтәрҙәрен, инә торған юлдарҙы һала. “Газпром нефтехим Салауат” яуаплылығы сикләнгән йәмғиәтенең инвестициялар һәм капиталь төҙөлөш буйынса директоры Александр Старцев һөйләүенсә, компания “Алға” махсус иҡтисади зонаһының буласаҡ заводтары өсөн ышаныслы сеймал менән тәьмин итеүсе буласаҡ. Радий Хәбиров компанияға конструктив позицияһы һәм резиденттар менән үҙ-ара һөҙөмтәле эш итеүҙәре өсөн рәхмәт белдерҙе. – “Газпром нефтехим Салауат” өлкән партнер, уның “Алға” махсус иҡтисади зонаһы резиденттары предприятиеларында тәрәнерәк тапшырғыстар өсөн сеймалдың төп тәьмин итеүсеһе булып сығыш яһай. Бының өсөн һеҙгә ҙур рәхмәт, – тип билдәләне Радий Хәбиров. Компания-резиденттар етәкселәре үҙҙәренең производствоһын үҫтереү мөмкинлектәре тураһында һөйләне. Мәҫәлән, “Фарус-Синтез” яуаплылығы сикләнгән йәмғиәтенең генераль директоры Линар Фәттәхов юғары май спирттары етештереү заводы сафҡа индерелгәс, уларҙы эшкәртеү тауарҙары етештереү предприятиеһын төҙөргә ниәтләүҙәрен белдерҙе. Республиканың ғаилә, хеҙмәт һәм халыҡты социаль яҡлау министры Ленара Иванова билдәләүенсә, компания етәкселәре буласаҡ предприятиеларҙы кадрҙар менән тәьмин итеү өсөн республика колледждары һәм вуздары менән әүҙемерәк эшләргә тейеш. Үҙ сиратында, ведомство яҡын-тирәләге муниципалитеттарҙа йәшәүселәрҙе уҡыта, улар махсус иҡтисади зона предприятиеларында эшләргә теләк белдергән. – Махсус иҡтисади зона биләмәһе эргәһендә урынлашҡан райондар өсөн уның барлыҡҡа килеүе яңы үҫеш импульсы бирә. Иң мөһиме, халыҡ өсөн юғары технологиялы производстволарҙа яңы эш урындары асыла, – тине Радий Хәбиров. Ултырыш аҙағында Башҡортостан Башлығы предприятие етәкселәренә тағы бер тапҡыр рәхмәт әйтеп, республиканың дәүләт наградаларын тапшырҙы. Фото: Башҡортостан Башлығы сайты.