"Үргә ос!" мәғариф проектының "Сәләмәт йылмайыу" модуле сиктәрендә Иглин ауылының Бесценный исемендәге 1-се урта мәктәбендә заманса стоматология кабинеты асылды. Уларҙы төбәк уҡыу йорттарында ойоштороу “Һаулыҡ һаҡлау” милли проектының маҡсаттарына һәм бурыстарына тап килә. Күләмле проект мәктәп уҡыусыларының һаулығын һаҡлауға йүнәлтелгән, профилактик тикшереү һәм балаларҙың ғына түгел, республика педагогтарының да планлы санацияларын уҙғарырға мөмкинлек бирә. Сәләмәтлек кабинетына өс блок инә: инструменттар, техника һәм мебель менән йыһазландырылған бер прививка яһау һәм ике стоматология блогы. Бер блокта – ҡабул итеү, икенсеһендә уҡыусыларҙы дауалау ойошторола. Уҡыусылар һәм мәктәп хеҙмәткәрҙәре өсөн бөтә процедуралар ҙа бушлай үткәрелә. Бындай кабинет өс йыл инде Иглин ауылының 3-сө урта мәктәбендә уңышлы эшләп килә. Был ата-әсәләргә һәм балаларға бик уңайлы. Ата-әсәләргә балаларын поликлиникаға яҙҙырырға кәрәкмәй, табип-стоматологтар даими рәүештә уҡыусыларҙы тикшерә, ә дауалау планға ярашлы уҙғарыла. Бынан тыш, ата-әсәләр менән әңгәмәләр һәм лекциялар формаһында аңлатыу эштәре алып барыла. Башҡортостан мәктәптәрендә 2023 йылда “Үргә ос!” мәғариф проектының “Сәләмәт йылмайыу” модуле сиктәрендә 26 яңы стоматология кабинетын асыу планлаштырыла. Ағымдағы йылда стоматология кабинеттары белгестәре 129 меңдән ашыу уҡыусыны ҡараған һәм яҡынса 38 мең баланы дауалаған. Билдәле булыуынса, “Һаулыҡ һаҡлау” (национальный проект “Здравоохранение”) милли проекты Рәсәй Президенты Владимир Путиндың май указы менән булдырылды. Фото: Иглин районы хакимиәте.