25 августа Салауат ҡалаһында Башҡортостан Башлығы Радий Хәбиров ҡалаға нигеҙ һалыныуға 75 йыл тулыу уңайынан тантаналы сараларҙа ҡатнашты. Төбәк етәксеһе Салауат халҡын мөһим дата менән ҡотланы һәм Башҡортостандың дәүләт наградаларын тапшырҙы. – Ҡәҙерле дуҫтар! Хөрмәтле салауаттар! Хөрмәтле ҡунаҡтар! Һеҙҙе Ҡала көнө менән ихлас ҡотлайым! 75 йыл – ул бик күп кеүек, әммә ысынбарлыҡта был бикаҙ. Салауат – киләсәккә ынтылған йәш, матур ҡала. Хөрмәтле салауаттар, һеҙгә хеҙмәтегеҙ, ышаныслы булыуығыҙ өсөн рәхмәт әйткем килә, – тине ул. – Салауат үҫешә. Йәштәр йәшәргә теләгән матур, сағыу, ҡыҙыҡлы ҡала буласаҡ. Барығыҙға ла именлек, изгелек теләйем. Һау-сәләмәт, бәхетле, уңышлы булығыҙ, ә республика бөтә яҡлап ярҙам итәсәк. Радий Хәбиров шулай уҡ Ағиҙел йылғаһының төҙөкләндерелгән ҡала яры менән танышты. Объект “Уңайлы ҡала мөхитен булдырыу” федераль программаһы сиктәрендә яңыртылды. Тауыш биреү йомғаҡтары буйынса 2020 йылда был биләмәне капиталь ремонт өсөн һайланылар. Беренсе этапта подрядсылар йәшелләндереү үткәрҙе, асфальт түшәне, ағас террасалар ҡуйҙы. Шулай уҡ яҡтыртыу һәм видеокүҙәтеү системаларын яңырттылар. Ҡала халҡы өсөн тренажёр комплексы, заманса балалар майҙансыҡтары һәм ял зоналары асылған. Икенсе этап йылғаға уңайлы төшөү урындары булдырыуҙы, яр буйын нығытыуҙы, металл пирс ҡуйыуҙы һәм халыҡтың аҙ хәрәкәт иткән төркөмдәре өсөн Ағиҙелгә төшөүҙе күҙ уңында тота ине. Проектты әҙерләгәндә кешеләрҙең бөтә теләктәрен иҫәпкә алдылар. Йәмәғәт биләмәһендә милли байрамдар темаһы буйынса бәләкәй архитектура формалары ла бар. Парктың көньяҡ өлөшөндә концерттар үткәреү һәм ҡаланың ижади коллективтарының сығыштары өсөн сәхнә лә ҡуйылған. – Мин бында төҙөлөш ваҡытында килдем. Бер нисә иҫкәрмә яһаным, үҙгәрештәр индерҙек. Һәйбәт килеп сыҡты. Яр буйы ҙур, балалар өсөн күп майҙансыҡтар бар. Был бик яҡшы. Артабан ҡала үҙе уйлаһын, халыҡ менән кәңәшләшһен, – тине республика Башлығы. – Бында урындың күп булыуы ҡыуандыра. Ваҡыт үтеү менән яңы объекттар төҙөлөүе ихтимал. Дөйөм алғанда, проект уңышлы килеп сыҡты, тип иҫәпләйем. Башҡортостан Башлығы Салауат халҡының республика үҫешенә индергән өлөшөн дә билдәләне. – Салауат – тәү сиратта кешеләр. Бында етештереүселәр юғары компетенцияларға эйә. Ҡалала йәшәүселәр үҙҙәренең салауаттар булыуы менән бик ғорурлана, – тине Радий Хәбиров. – Ҡала әүҙем үҫешә. Төҙөкләндереү линияһы буйынса тағы ла күп нәмәләр өҫтәргә кәрәк. Биҫтәләрҙең береһендә мәктәп кәрәк. Ә дөйөм алғанда, яҡшы ҡала һәм ҡеүәтле индустриаль үҙәк. Фото: Башҡортостан Башлығы сайты.