Бөрйән районында Волга буйы федераль округының “Йәштәр йыйыны-2023” IV Йәштәр граждандар форумы тамамланды. 22 - 25 августа Башҡортостан Республикаһы Бөрйән районында палаталар лагеры форматында Волга буйы федераль округының “Йәштәр йыйыны-2023” IV Йәштәр граждандар форумы үтте. Унда 18 - 35 йәшлек 1000-дән ашыу йәш кеше ҡатнашты. Улар - Волга буйы федераль округы төбәктәренән килгән егет-ҡыҙҙар, Мәскәү, Санкт-Петербург, Ҡазанда уҡыған Башҡортостан студенттары, шулай уҡ йәштәр сәйәсәте ойошмалары һәм учреждениелары вәкилдәре. - Республика йәштәре йыл һайын Бөтә Рәсәй форум кампанияларында ҡатнаша. Улар “Iволга”, “Территория смыслов”, “ШУМ”, “Таврида” кеүек 30-лаған Бөтә Рәсәй һәм округ саралары. Бер нисә йыл элек беҙ республикала ҙур йәштәр форум майҙансығын булдырыу өҫтөндә эшләй башланыҡ. Төбәк йәштәрен, ситтә уҡыған студенттарҙы бер урынға туплау ниәтендә “Йәштәр йыйыны” барлыҡҡа килде, - тип һөйләне Йәштәр сәйәсәте буйынса БР дәүләт комитеты рәйесе Яна Гайдук. Быйыл бындай форум дүртенсе тапҡыр үтте. Сарала йәштәр бер юлы бер нисә платформала эшләне. Улар – “Мәктәптә үҙидара” (Башҡортостан Республикаһында ”Беренселәр хәрәкәте” бүлексәһе вәкилдәре өсөн), “Студенттар үҙидараһы. Юғары уҡыу йорто” (студенттарҙың үҙидараһы үҫеше өсөн яуаплыларға, студенттар үҙидараһы органдары вәкилдәре өсөн)”, “Студенттар үҙидараһы. Урта һөнәри белем биреү” (студент ойошмалары лидерҙары, студенттар үҙидараһы органы вәкилдәре өсөн), “Медиатрендтар” (медиасфера вәкилдәре, студенттарҙың медиа һәм йәштәр ойошмалары өсөн) , “Ауыл йәштәре” (йәш ауыл сәнәғәте комплексы вәкилдәре, ауыл йәштәре өсөн), “Йәштәр сәйәсәте кадрҙары” (йәштәр сәйәсәте органдары һәм учреждениелары етәкселәре һәм белгестәре, йәштәр ойошмалары лидерҙары өсөн), “Атайсал” (Мәскәү, Санкт-Петербург, Ҡазанда – ситтә уҡыған Башҡортостан йәштәре өсөн), I Республика студенттарҙың туристик слеты, эшләп йөрөгән йәштәрҙең республика ижади фестивале. Бынан тыш, Йәштәр эштәре буйынса федераль агентлыҡтың йәштәр инициативаһы гранты ярҙамында Бөтә Рәсәй йәштәр проекты конкурсы, “ОбъективНО” ҡыҫҡа метражлы кино йәштәр фестивале, “Этника” йәш дизайнерҙар конкурсы үтте. Форумдың тәүге эш көнөндә төбәк башлығы Радий Хәбиров ҡатнашты. Уның билдәләүенсә, “бөгөнгө йәштәр – иң яҡшыһы”. - Һеҙ аҡыллы, сағыу, маҡсатлы. Беҙ, өлкән иптәштәр, һеҙҙе яратабыҙ һәм томошоғоҙҙоң уңышлы булыуын теләйбеҙ. Шул уҡ ваҡытта беҙ һеҙгә терәк итеп ҡарайбыҙ. Тыуған илебеҙҙең, Башҡортостандың терәге итеп. Беҙҙең ҡулдарҙағы байраҡты алып илде алға әйҙәүсе итеп ҡарайбыҙ. Үҫегеҙ, тәүәккәлләгеҙ, ижад итегеҙ. Һеҙҙең барыһы ла килеп сығасаҡ, - тине ул. Радий Хәбиров ағастан самолет моделдәре йыйыу һәм осороу команда квесында ҡатнашты һәм форум делегаттары менән һөйләште, һорауҙарға яуап бирҙе. Сарала йәштәр Башҡортостандың билдәле алып барыусылары һәм блогерҙарҙың лекцияларын тыңланы. Атап әйткәндә, “Атайсал” йүнәлеше буйынса БЮТ телеканалы алып барыусыһы Лилиә Ҡурамшина, Мостай Кәрим исемендәге театр актеры Шәһит Хамматов, каратэ буйынса Рәсәй чемпионы Илсур Нәбиуллин, фермер Айтуған Фәттәхов йәштәргә үҙ тәжрибәләрен уртаҡлашты.