Йылайыр районының Матрай ауылы халҡы Алик кейәүҙәренән уңған. Уның оҫта ҡулдары менән бында арт-объекттар ҙа барлыҡҡа килгән. Заказ буйынса эскәмйәһен дә, ҡапҡаһын да эшләй ул. Әбйәлил районының Атауҙы ауылы егете Алик Мәхейәнов ата-әсәһенең ғаиләһендә тәүге бала булып донъяға килә. Бәләкәйҙән һәр малай кеүек техника янында уралып, тимер-томор араһында соҡсоноп үҫә. Мәктәпте тамамлау менән Асҡар ауылындағы һөнәрселек училищеһында тракторсыға уҡып ала, унан иретеп-йәбештереүсе һөнәрен дә үҙләштерә. Егетмен тигән кешегә етмеш төрлө һөнәр ҙә аҙ тигәндәй, оҫта ҡуллы Алик төҙөлөш менән дә мауыға башлай. Нәҡ ошо эше уның яҙмышында хәл иткес роль уйнай ҙа инде. 2008 йылда ул үҙе эшләгән төҙөлөш бригадаһы менән Йылайыр районының Матрай ауылына мәктәпкә ремонт эшләргә килә. Нәҡ ошо мәлдә таныша ла инде Лилиә менән. Бер ни тиклем дуҫлашҡандан һуң, йәштәр ғаилә ҡора. Матрай һылыуын ғына түгел, ауылдың үҙен дә яратҡан егет ошо ауылда төпләнеп, йорт һалырға ҡарар итә. Йәш ғаиләлә бер-бер артлы өс ҡыҙ донъяға килә. Әле өлкән ҡыҙҙары Айһылыу Өфөлә белем ала, буласаҡ географ. 13 йәшлек Аида менән 8 йәшлек Илида – мәктәп уҡыусылары. Ҡорған ғаиләләренең усағын һүндермәй, йорттарына ҡот һәм йылы биреп торған хужабикә Лилиә Юлдаш ҡыҙы ауылдағы “Йәйғор” балалар баҡсаһына етәкселек итә. – Иремдән уңдым. “Башҡорт баҡыры” йәмғиәтендә иретеп-йәбештереүсе булып эшләй ул. Айҙың 15 көнөн эшендә үткәрә, ҡалған 15 көнөндә ял итә, әммә өйҙә һис ҡул ҡаушырып ултырмай, йә берәй төҙөлөштә йөрөй, йә заказ буйынса ҡапҡа, эскәмйә, мангал, беседка, бәүелсәк, мунса эшләй. Ауылға арт-объект та эшләп бүләк итте. Ул – ҡышын янып, ауылға йәм биреп, балҡып янып торған йондоҙ. Ә балалар баҡсаһына шундай матур ай эшләп бирҙе, – тип һөйөнә Лилиә Юлдаш ҡыҙы. Ике уңған йәрәшһә, бәхет барыр йәнәшә, тигәндәй, был ғаилә эшкә бөтмөр, сос һәм хеҙмәт һөйә, шуға ла тормоштары алға бара. Оҫта ҡуллы, бер эштән дә ҡурҡмаған, нимәгә тотонһа ла, матур итеп ослап ҡуйған, егәрле Аликка ла, яҡты хыялдар менән йәшәп, маҡсатҡа ынтылышып, ирен ир итеп, маҡтап, донъяһын ялтыратып тотҡан, эшен дә йәнәшә алып барған Лилиәгә лә ауылдаштары һоҡланып баға. Ошондай күркәм ғаиләләр күберәк булһа ине! Резеда ВӘЛИЕВА