Башҡортостан Хөкүмәте вице-премьеры Алан Марзаев “Хәүефһеҙ сифатлы юлдар” милли проекты сиктәрендә Бөрө-Таҙтүбә-Һатҡы юлын реконструкциялау барышын тикшерҙе. Эштәр Дыуан һәм Ҡариҙел райондарында 40 километрҙан ашыу оҙонлоҡтағы участкала алып барыла. Подрядсы ойошма юл һала, уйҙырмаларҙы, автобус туҡталыштарын, локаль таҙартыу ҡоролмаларын урынлаштыра, һыу үткәреү торбаларын нығытыуҙы башҡара. – Был Башҡортостанда тормошҡа ашырылған иң оҙон юл объекттарының береһе. Юл республиканың төньяҡ-көнсығышын үҙәк менән тоташтырасаҡ, шулай уҡ Силәбе һәм Свердловск өлкәләре менән транспорт бәйләнешен тәьмин итәсәк. Был, әлбиттә, Башҡортостан Республикаһы иҡтисады үҫешендә яңы этәргес бирәсәк, – тине Хөкүмәт Премьер-министры урынбаҫары Алан Марзаев. Объектҡа 200-ҙән ашыу кеше һәм 110 берәмек техника йәлеп ителгән. Эштәр тәүлек әйләнәһенә алып барыла. Барлыҡ эштәр 2023 йылдың дүртенсе кварталында тамамланасаҡ. “Хәүефһеҙ сифатлы юлдар” милли проекты (национальный проект Безопасные качественные дороги) “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында президент Владимир Путин Указы положениеларын үтәү өсөн Рәсәйҙең Транспорт министрлығы тарафынан әҙерләнгән. Милли проекттың масштабы бөтә илде солғап ала, унда Рәсәйҙең 84 субъекты ҡатнаша. Фото: Транспорт һәм юл хужалығы министрлығы.