Өфөнән 74 йәшлек Флария Парфентьева үҙеңдең хыялыңа ирешеүҙә йәш сикләүе булмауын иҫбатланы. Ул Санкт-Петербургта үткән Бөтә Рәсәй бейеү фестивалендә көмөш миҙал яуланы. Был конкурста һәүәҫкәр бейеүселәр ҙә, профессиональ хореографтар ҙа сығыш яһаны. Флария Парфентьева биш йәштән балерина булыу тураһында хыяллана. Әммә тормош шарттары уға был теләкте оҙаҡ ваҡыт тормошҡа ашырырға мөмкинлек бирмәгән. Хәйер, ул һис тә өмөтһөҙлөккә бирелмәгән һәм бейеүгә булған һөйөүен ғүмер буйына һаҡлаған. Яҡташыбыҙ тәүге тапҡыр балет менән ике йыл элек кенә шөғөлләнә башлаған. Ул Өфөләге Башҡорт дәүләт опера һәм балет театры ҡарамағындағы студияға йөрөй. Аҙнаһына дүрт көн дауамында 55-шәр минут шөғөлләнә. - Бейеү фестиваленә Рәсәйҙең төрлө ҡалаларынан - Новокузнецкиҙан Калининградҡа тиклем - һәүәҫкәрҙәр йыйылды. Мин "Атаманша" бейеүе менән сығыш яһаным. Ныҡ тулҡынландым. Әммә үҙемдең йәш төркөмөндә икенсе урынды яуланым. Бер ҡыҙ яныма килеп: «Дуҫтарым һеҙҙең телевизорҙа интервью биргәнегеҙҙе күрҙе һәм: "Был бит ябай кеше түгел, ә актриса. 70 йәштән һуң кеше балет менән шөғөлләнә алмай!" - тине. Ә мин уларға, был - ысын хәл, һеҙҙең менән бер майҙансыҡта бейейем, тинем!" - тип белдерҙе. Минең бала саҡ хыялымды тормошҡа ашырыуҙа ярҙам иткән барыһына ла - балет студияһына, хореографыма, ғаиләмә рәхмәт белдерәм, - ти Флария Парфентьева. Фото: https://vk.com/flaria_parfenteva