Һуңғы йылдарҙа телефон терроризмы киң тарала башланы. Мәҫәлән, киң мәғлүмәт сараларында тегендә йә бында бомба, шартлатҡыс һалыуҙары, шул арҡала кешеләрҙе эвакуациялауҙары тураһында хәбәрҙәр донъя күреп тора. һөҙөмтәлә тикшереүҙәргә күп көс һәм сығымдар сарыф ителә. Быйыл 9 февралдә республикала йәшәүсе бер ир ваҡ хулиганлыҡ өсөн Өфөлә полиция бүлегендә ултырып сыҡҡандан һуң кеҫә телефонынан 102 номерына шылтыратып полиция бүлегендә шартлатҡыс һалыныуын хәбәр итә. Бомба табылмай, ә бына хулиган судҡа бирелә. 47 йәшлек ир белә күрә ялған хәбәр таратҡан өсөн енәйәт яуаплылығына тарттырыла. Шулай уҡ ағымдағы йылда хоҡуҡ һаҡлаусылар Стәрлетамаҡтың дөйөм белем биреү учреждениеларының береһендә мәктәп ашханаһы хеҙмәткәрен фашланы, ул дүрт тапҡыр мәктәптең электрон адресына учреждениела теракт әҙерләнә тип хат яҙа. Сәйер ҡылығын ул хулиганлыҡ тип аңлата. Уға 3-5 йылға иркенән мәхрүм ителеү янай. Бынан тыш, хоҡуҡ һаҡлау органдары террор йүнәлешендәге енәйәттәрҙең яңы ысулы менән осрашҡан. Мутлашыусыларҙың мәғлүмәтенән аңдары томаланған кешеләр уларҙың өйрәтеүе буйынса хәрби комиссариаттарға ут төртөү ойоштора. Әгәр элек бындай енәйәттәр һирәк осраһа, хәҙер ошондай осраҡтар күп төбәктәрҙә теркәлә. Алдау һөҙөмтәһендә шулай эшләһәләр ҙә, ғәйеплеләргә енәйәт яуаплылығы янай. Мәҫәлән, 31 июлдә Омскиҙа педагогия колледжы студенты булған ҡыҙҙы ҡулға алғандар. Ул Үҙәк һәм Совет административ округтары буйынса хәрби комиссариатҡа ут төртөргә маташҡан. Асыҡланыуынса, уға билдәһеҙ әҙәмдәр шылтыратҡан һәм уның исеменә кредит юлланғаны, аҡсаһын урлағандарын хәбәр иткән. Артабан крдеит биргән банк бүлексәһе хеҙмәткәрҙәренән үс алырға ҡотортҡандар һәм, йәнәһе шул учреждениеның адресы тип, хәрби комиссариат адресын әйтеп, ут төртөргә ҡушҡандар. Студент ҡыҙ ишеккә тиҙ янып китә торған шыйыҡса һибеп торғанда тотола. Шул уҡ көндө мутлашыусылар ҡушыуы буйынса пенсионер ҡатын Калуга ҡалаһында хәрби комиссариат бинаһының беренсе ҡат тәҙрәһенә яныусы матдә һалынған быяла шешә ырғыта. Енәйәт ҡылыусыны урында тотҡандар, янғынды һүндергәндәр. Мәскәү янындағы Подольскиҙа хәрби комиссариаттың ишеген яндырған өсөн элек мутлашҡан өсөн хөкөм ителгән ресторан менеджерын ҡулға алғандар. Йәш кеше әйтеүенсә, уға Үҙәк банктан шылтыраталар һәм кредитҡа 35 мең һум аҡса алып, улар әйткән иҫәпкә күсертәләр. Артабан, «мутлашыу осрағын» туҡтатыу өсөн, уға хәрби комиссариатты яндырырға тәҡдим итәләр. Бер нисә сәғәттән Подольск хәрби комиссариатына йәнә һөжүм итәләр - был юлы ишеккә тиҙ тоҡаныусы шыйыҡлыҡ һалынған шешәне пенсионер ырғыта. Алдан мутлашыусылар талабы буйынса ул Һаҡлыҡ банкында 2,5 миллион һумлыҡ кредит алған, һуңынан аҡсаны улар иҫәбенә күсергән. Ут төрткәндән һуң аҡсаның бер өлөшөн кире ҡайтарырға вәғәҙә бирәләр. Ә Ҡазанда бер ҡыҙ, имеш, бер хоҡуҡ һаҡсыларынан телефон аша дистанцион мутлыҡ ҡылған енәйәтселәрҙе тотоу өсөн Татарстан Республикаһының Хәрби комиссариаты бинаһына ут төртөү тураһында йөкләмә ала. Ул шешәһен бинаға ташлаған, ләкин янғын сыҡмаған. Феодосияла урындағы мәктәптәрҙең береһендә эшләгән 51 йәшлек рус теле уҡытыусыһы хәрби комиссариат яғына яныуман шыйыҡса ҡойолған шешә ташлаған. Ҡатынды енәйәт урынында тоталар, хулиганлыҡ тураһында эш ҡуҙғаталар. Һорау алыуҙа ул,Украинаның махсус хеҙмәттәре ҡорбаны булыуын хәбәр итә. Уҡытыусы һүҙҙәренсә, ул үҙҙәрен банк һәм хоҡуҡ һаҡлау органдары хеҙмәткәрҙәре тип танытҡан кешеләрҙең телефон аша күрһәтмәһе буйынса эш иткән. Улар уны был аҙымға барырға күндергән. Ул шулай уҡ өс миллион һумлыҡ кредит алып, уға шылтыратып әйткән иҫәпкә күссереүен белдерә. Бындай осраҡтар Рәсәйҙә Украина биләмәһендә махсус хәрби операция башланғандан һуң даими күҙәтелә, әммә тәүге тапҡыр күмәк һөжүмдәр 31 июлдә теркәлде. Ут төртөүселәргә ҡарата шул иҫәптән террористик йүнәлештәге енәйәттәр өсөн дә енәйәт эштәре ҡуҙғатыласаҡ. Фото: ru.freepik.com