Рәсәй Геройҙары йәмғиәт тормошонда әүҙем ҡатнаша һәм үҫеп килгән быуынды тәрбиәләү буйынса эште үҙ миҫалында башҡарырға әҙер. Был хаҡта Башҡортостанда тыуып үҫкән Рәсәй Геройы, запастағы Хәрби-һауа көстәре полковнигы Рафиҡ Ихсанов белдерҙе. Көн элгәре Рәсәй Президентының Волга буйы федераль округындағы Тулы хоҡуҡлы вәкиле Игорь Комаров Ҡазан ҡалаһында Рәсәй Федерацияһы Геройҙары менән осрашты, унда улар йәштәргә патриотик тәрбиә биреү мәсьәләләрен тикшерҙе. Игорь Комаров хәрбиҙәргә Тыуған илде яҡлағандары өсөн рәхмәт әйтте һәм уларҙың батырлығы илебеҙ халҡы, айырыуса йәштәр өсөн баһалап бөткөһөҙ, улар өлгө булып тора, тип билдәләне. «Тыуған илгә һөйөү тураһында чиновниктар, власть вәкилдәре һүҙ йөрөткәндә йәштәр быны бер төрлө ҡабул итә, ә үҙҙәре ошо юлды үткән кешеләр һөйләһә - быға бөтөнләй икенсе мөнәсәбәт, уның баһаһы ла ҡиммәт. Беҙгә һеҙҙең белем һәм тәжрибәгеҙҙе үҫеп килгән быуынға еткереүгә булышлыҡ итеү мөһим», - тип һыҙыҡ өҫтөнә алды Игорь Комаров. Игорь Комаров менән осрашыуҙа ҡатнашҡан Рафиҡ Ихсанов «Башинформ» мәғлүмәт агентлығына йәштәр мөхитендә тәрбиәүи эш буйынса фекерҙәрен уртаҡлашты. Уның фекеренсә, ул комплекслы булырға һәм унда ветерандарға, шул иҫәптән махсус хәрби операцияла ҡатнашыусыларға айырым урын бирелергә тейеш. «Осрашыуҙа беҙҙән йәштәрҙе патриотик рухта тәрбиәләү мәсьәләләре хаҡында һөйләүҙе һәм уртаҡлашыуҙы һоранылар. Беҙ йыл һайын Рәсәй төбәктәрендә «Ватан Геройҙары вахтаһы» акцияһын үткәрәбеҙ һәм патриотик эштәге ҡаҙаныштар тураһында ғына түгел, шулай уҡ проблемалар хаҡында ла беләбеҙ. Игорь Комаровҡа беҙҙең саралар тураһында һәм Рәсәйҙә Бөйөк Ватан һуғышы йылдарында уҡ ошо исемгә лайыҡ булған ике Советтар Союзы Геройының ғына иҫән ҡалыуы тураһында һөйләнек. Уларға 100-әр йәш. Дан орденының тулы кавалерҙары был донъяла юҡ инде. Рәсәй Геройҙары - 614 кеше. Уларҙың яртыһынан ашыуына был исем үлгәндән һуң бирелгән. Ветерандарҙың, шул иҫәптән Геройҙарҙың роле бик ҙур. Улар шәхси өлгө булып тора. Ветерандарға иңдәрендә йәш быуынды тәрбиәләү өсөн яуаплылыҡты тойоу, ә йәштәргә өлгө барлығын күреү мөһим», - ти Рафиҡ Ихсанов. Рафиҡ Ихсанов осрашыуҙа ҡатнашыусыларҙың береһе махсус хәрби операция ветерандары ойошмаһын булдырыу тәҡдимен индереүен һөйләне. Әммә, Рафиҡ Рәшит улы фекеренсә, бындай зарурлыҡ юҡ, сөнки илдә МХО-ла ҡатнашыусылар һәм уларҙың ғаиләләре менән эшләгән бер нисә ветеран ойошмаһы булдырылған. Хәйер, был мәсьәлә әле тикшерелә һәм унда МХО-ла ҡатнашҡан «йәш» ветерандарҙың да ағза булыуы мөһим. «Рәсәй Федерацияһы Геройҙары төрлө быуын вәкилдәрен туплауҙа, йәштәрҙе тәрбиәләүҙә, МХО-ла ҡатнашыусыларға ярҙам итеү буйынса йәмғиәт тормошонда әүҙем ҡатнаша һәм һәр саҡ ҡатнашырға әҙер. Беҙгә ил етәкселеге менән йышыраҡ осрашырға һәм йәш быуынды борсоған мәсьәләләрҙе һәм уларҙы хәл итеү юлдарын тикшерергә тәҡдим иттеләр. Минеңсә, МХО-ла яу юлын үткән яугирҙәргә медицина, психологик реабилитациялау үткәрергә әҙер булырға кәрәк. Яугирҙәрҙе патриотик характерҙағы төрлө сараларға йәлеп итеү мөһим. МХО ветерандары һәр урында ла үҙҙәренең кәрәклеген белергә, тойорға тейеш», - тип һыҙыҡ өҫтөнә алды «Башинформ» мәғлүмәт агентлығы хәбәрсеһе менән әңгәмәлә Рафиҡ Ихсанов. Фото:Олег Яровиков. Сығанаҡ: https://www.bashinform.ru/news/svo/2023-08-30/urozhenets-bashkirii-geroy-rossii-rafik-ihsanov-rasskazal-o-roli-veteranov-svo-v-vospitanii-molodyozhi-3412075