Башҡортостандың “Технопром-2023” фәнни-технологик форумында ҡатнашыуының икенсе көнө Евразия фәнни-белем биреү үҙәге үҫеше векторын билдәләне. Башҡортостан – фәнни-технологик сараның генераль партнеры. Республика делегацияһы Новосибирск ҡалаһында үткән сарала әүҙем эш алып бара. “Беҙҙең алда сара сиктәрендә компетенциялар менән уртаҡлашыу бурысы ғына тормай, ә күршеләребеҙҙең үҫешен ҡарап, яңы тәжрибәләр алырға ниәтләнәбеҙ”, – тине Башҡортостан Башлығы хакимиәте етәксеһе Максим Забелин. Башҡортостан стендында Евразия фәнни-белем биреү үҙәге университеттары һәм партнерҙарының алдынғы эшләнмәләре тәҡдим ителгән. Өфө нефть техник университеты форумда бер юлы ике стендта – Башҡортостанда һәм "Планетаның шыйыҡ углеводород запастарын рациональ үҙләштереү" донъя кимәлендәге ғилми үҙәгендә үҙенең ҡаҙаныштарын тәҡдим итә. Иң мөһиме – Технопром майҙаны юғары уҡыу йортона партнерҙар селтәрен киңәйтергә мөмкинлек биргән. Белем биреү учреждениеһы Новосибирск дәүләт архитектура-төҙөлөш университеты һәм Новосибирск дәүләт университеты менән хеҙмәттәшлек тураһында килешеү төҙөнө. Форумдың икенсе көнөндә Башҡортостан стендында Новосибирск өлкәһе Губернаторы, РФ Дәүләт Советының “Фән” йүнәлеше буйынса комиссия рәйесе Андрей Травников булды. Сара сиктәрендә ултырыш үтте. Уның сиктәрендә РФ Фән һәм юғары белем биреү министры урынбаҫары Денис Секиринский 2023 йылда Рәсәй Федерацияһы субъекттарының Фәнни-технологик үҫеш милли рейтингы күрһәткестәре системаһын камиллаштырыу кәрәклеге тураһында белдерҙе. Ултырышта шулай уҡ университеттарҙа кадрҙар әҙерләү мәсьәләһе тикшерелде һәм ошо йүнәлеш буйынса субъекттарҙың иң яҡшы тәжрибәләре ҡаралды. Башҡортостан Мәскәү, Санкт-Петербург, Татарстан, Ростов, Свердловск, Новосибирск һәм Томск өлкәләре, Красноярск крайы һәм Һамар менән бер рәттән инженерлыҡ өлкәһендә 2023/24 уҡыу йылына ҡабул итеүҙең контроль һандарын билдәләү буйынса тәүге 10 төбәк иҫәбенә инде. Эксперттар фекеренсә, был субъекттар илдә инженерлыҡ әҙерлеге үҙәге булып тора һәм башҡа субъекттарҙың иғтибары уларға йәлеп ителергә тейеш. X “Технопром” халыҡ-ара технологик үҫеш форумы 22 августа Новосибирскиҙа старт алды. Ике көн эсендә форумға 13 меңдән ашыу ҡатнашыусы килде һәм 14800 кеше онлайн рәүештә ҡараны. Башҡортостан стенды форумда 2023 йылдың 25 авгусына тиклем эшләйәсәк. Фотолар: “Башинформ”