Быйыл Рәсәйҙә иң ҙур “Һөт иле” ғаилә фестивале 2 сентябрҙә Дуҫлыҡ монументы эргәһендәге Ағиҙел йылғаһы буйындағы яңы майҙансыҡта үтәсәк. Бөгөн ул - ҡала халҡының йөрөү өсөн иң яратҡан урындарының береһе, Башҡортостандың баш ҡалаһының визит карточкаһы. – Башҡортостан һөт республикаһы булды һәм булып ҡала, – тине БР Хөкүмәте Премьер-министры урынбаҫары – ауыл хужалығы министры Илшат Фәзрахманов. – Беҙҙә тауар һөтөн етештереү күләме арта. 2022 йылда төбәктең ауыл хужалығы предприятиелары һәм фермер хужалыҡтары 760 мең тонна юғары сифатлы продукт алған. Республикала һөт эшкәртеү буйынса 80-гә яҡын предприятие эшләй, улар ҙур запас менән төбәкте төрлө һөт продукттары менән тәьмин итә ала. Өфөлә йәшәүселәр һәм ҡунаҡтар 11-се һөт фестивален ҡарап, быға инана аласаҡ. Быйыл сара “Байрамға ҡушыл!” тип атала. Йола буйынса бөтә ҡунаҡтарҙы “Рәсәй һөтө” компаниялар төркөмөнөң “Беренсе тәм” сауҙа маркаһынан сәләмләү стаканы көтә. Хәтерегеҙгә төшөрәбеҙ, уҙған йылдарҙа фестивалгә килеүселәр бер майҙансыҡта 60 мең стакан йәки 12 тоннанан ашыу һөт эсеп рекорд ҡуйҙы. “Һөт иле-2023”-тә яратҡан аттракциондар, спорт майҙансыҡтары, фудкорт зонаһы, һөт йәрминкәһе, ферма, балалар өсөн оҫталыҡ дәрестәре эшләйәсәк. 449 килограмлы “Салауат” туңдырмаһы отошо уйнатыла (Башҡортостандың баш ҡалаһына йылдар һаны буйынса). Сара ҡунаҡтары өсөн урам гастрономия фестивале эшләйәсәк. Сығанаҡ: pravitelstvorb.ru/news/21592, vk.com/albums-98975065