Кешеләр ҙә ағастарға оҡшаш... Кешеләр ҙә ағастарға оҡшаш: Бар имәне, ҡайын, бар саған... Һәр беренә рәхмәт әйткем килә, Кемдәр минең юлда осраған. Имән кеүек көслө рухлылар бар... Сыҙамлыҡҡа улар өйрәтте. Ҡайын кеүек хисле күңеллеләр Алсаҡлыҡҡа юлдар күрһәтте. Алтын төҫө саған япрағының Алтынлата, гүйә, аҡылды. Эшсән уҫаҡ ағасынан күсә Хеҙмәт һөйөү, оло таһыллыҡ. Эсе серек булған ағастар ҙа Лайыҡтыр, тим, минең рәхмәткә. Эйе, рәхмәт... Рухым нығына бит Ҡаршы тороп мәкер-зәхмәткә. Бәғзеләре, арҡырылай ятып, Юлдарыма юрый ауҙылар. Көнсөл тойғоларҙа ҡара янып, Бары тиреҫ булып ҡалдылар. Урмандарҙан уҙып барған саҡта Һәр бер ағас миңә ҡәҙерле. Саф күңелле әгәр булһа кеше - Ихласлыҡҡа мин дә әҙермен! Аҫыл ағастарҙы үрнәк итеп Мин дә бер мәл тамыр йәйермен! Әнүзә Рәис ҡыҙы Ғиззәтуллина (Ниғмәтуллина) Бөрйән районы Иҫке Монасип ауылында тыуған. Иҫке Монасип урта мәктәбен алтын миҙалға тамамлап, М. Аҡмулла исемендәге Башҡорт дәүләт педагогия университетының хоҡуҡ һәм тарих институтында белем ала. 2013 йылда “Һылыуҡай” республика гүзәллек бәйгеһендә Гран-при яулай. “Йөрәк һүҙе – 2019” республика шиғриәт бәйгеһендә Башҡортостандың атҡаҙанған артисы Земфира Байбулдина, уның шиғырҙарын яттан һөйләп, еңеүгә өлгәшә. “Китап” нәшриәтендә “Гәлсәр күңел” исемле китабы баҫылып сыға. 2020 йылда Сибай концерт-театр берекмәһендә ҡуйылған “Ғаиләм-ҡәлғәм” исемле тамашаның авторы. Шиғри шәлкемдәре төрлө йылдарҙа “Башҡортостан” гәзитендә, “Ағиҙел”, “Башҡортостан ҡыҙы” журналдарында баҫылып сыға. Бөрйәндең талантлы ҡыҙы Әнүзә Ғиззәтуллина өсөн бында тауыш бирергә: https://vk.com/app7198399_-104965500#poll64dca07757c133552b04cf2c Ә иһә барлыҡ бәйгеселәрҙең дә шиғырҙарын бында ҡарарға: https://bashgazet.ru/articles/-bi-t-m-m-ni-t/2023-08-16/may-anda-sha-ir-ar-3390917 Һәм тауыш бирергә була: https://vk.com/app7198399_-104965500#poll64dca07757c133552b04cf2c Тауыш биреү 27 сентябрҙә 21:00 сәғәттә туҡтатыласаҡ. Иҫкәрмә: еңеүсене билдәләгәндә “Башҡортостан” гәзите төркөмөнә яҙылғандарҙың тауышы ғына иҫәпкә алынасаҡ. Беҙҙең менән ҡалығыҙ, ҡалған бәйгеселәр хаҡында ла уҡығыҙ, дуҫтар!